Adyň Maksat bolsa-da, bolmasa-da...

Adyň Maksat bolsa-da, bolmasa-da, her kim dünýä inmeginde kakalar, ejeler bir maksady tutunan bolsa gerek. Birnäçe gyzymyz bardy, ahyry oglumyz boldy, maksadymyza ýetdik diýýänler bardyr. Birinji çagam ogul bolsa, adyna Maksat dakjak, meniň maksadym ogul diýýänler bardyr. Ýa-da bir wezipä geçmäge höwes edip ýörkä, perman bilen höwes edýän wezipesine bellenen kakaň ogly bolandyr. Olam maksadyma ýetdim diýip oglunyň adyna Maksat goýandyr. Çagaňa Maksat adyny dakmak üçin ýüzlerçe bahana bolup biler. Ýöne ogluň dünýä inmeginiň maksady şeýle ýüzleýmikä? Umuman biz dünýä inemizde kakamyz nämäni maksat edindikä? Biz kakamyzy şol ýüregine düwen maksadyna ýetirdikmikäk? Ýa çagaň dünýä inmeginiň maksady köpelmekmikä?
Türkmenler, ýagny biziň milletimizde maksat goýup çagaly bolmak pikiri, düşünjesi barmyka? Iliňem ogly bar meniňem oglum bolaýsa diýip maksat edinip köpelip barýarmykak?
Ertirçileriň köpüsi öýlenmedikler, durmuşa çykmadyklar. Emma, inşalla olaram ata-ene bolarlar. Şonda olar özlerine nähili maksady tutunarkalar? Ýa entek bu barada pikir etmek irmi?
Meniň pikirimçe ir däl. Sebäbi ýanýoldaş, aslyýetinde, nesliňi dowam edirmek üçin saýlanylýar. Onsoň onuň nähili dowam etmegini isleýän bolsaň, şoňa görä-de, nesliňi dowam etdirjegi saýlaýaň. Diýmek, geljekki çagamyzyň kim boljagy, söýjek gyzymyza, ýigidimize bagly. Mysal üçin, okuwly oglana durmuşa çykmak bilen, daýhan oglana durmuşa çykmagyň geljekki nesliň kim boljagyna azda-kände täsir edip biler. Hernä pikirimi düşündirip bilendirin-dä. Siz maksadyňyzy – geljekki Maksadyňyzyň kim boljagyny nähili göz öňüne getirýärsiňiz? Özüňizi kakaňyzyň haýsy maksady hasap edýärsiňiz hem ony şol maksadyna ýetirip bildiňizmi?