KOFE PEÝDALYMY ýa-da ZYÝANLY?

Uzak ýyllaryň dowamynda kofäniň saglyk üçin zyýanlydygy, ylaýta-da ýürege erbet täsir edýändigi baradaky ýalňyş pikirlere eýerilip gelindi. Dogry ulanylanda, bu içginiň zyýan ýetirmek beýlede dursun, hatda oňa içden we daşdan oňyn täsir edip, ähli ulgamlarynyň işine itergi berýändigini dürli ýurtlaryň alymlarynyň geçiren ylmy-barlag işleri görkezdi. Kofe içilende içki (ýürek, bagyr, içege, beýni...), ýapgy, çalgy görnüşinde ýa-da tämizleýji serişdeleriň düzüminde peýdalanylanda bolsa, daşky (saç, deri, gabak we ş.m.) beden agzalarynyň hyzmatyny işjeňleşdirýär.
KOFÄNIŇ IÇKI TÄSIRI
 Käbir alymlaryň pikirine görä, kofe peşew çykaryjy häsiýete eýe bolup, bedeniň bedeniň suwsuzlanmagyna getirip bilýär. Ýöne gorkup oturasy iş ýok. Görlüp oturylsa, onuň şeýle täsiri diňe bir gezekde 0,5 litrden köp mukdary kabul edilende ýüze çykýan eken.
 Kofe ýüregiň işini aktiwleşdirýär. Şol bir wagtda arteriýa gan basyşyny ýokarlandyrýar. Bir käse kofe içilende, 2 sagadyň dowamynda gan basyşynyň görkezijisiniň simap sütüni boýunça 15 mm galmagy ähtimal.
 Dünýäde kofäniň ulanylyşy boýunça 1-nji orunda durýan Finlandiýada geçirilen ylmy-barlag işleri bu içginiň 2-nji tipli süýjüli diabetiň döremek howpuny azaldýandygyna güwä geçýär.
 Dowamly gastritde, kolitde, enteritde (hat-da durnukly remissiýa döwründe-de) kofäni diňe süýt bilen içmek maslahat berilýär. Ýekeje saparda kofäniň 10 gramy ulanylanda, adamyň ölmegi mümkindir. Şonça kofeden takmynan 100 käse kofe içgisini taýýarlap bolýar. Birbada 100 käse kofäni hiç kimiň içip bilmejekdigi bellidir.
 Kofe bagyr sirrozyndan goraýar. Kaliforniýaly lukmanlaryň hasaplamalaryna görä, günde 1-3 käse kofe içýän adamlarda sirroza duçar bolmak howpy 40%-e çenli azalýar.
KOFENIŇ DAŞKY TÄSIRI
 Täze taýýarlanylyp, sowadylan kofe bilen boýun töweregini süpürmek maslahat berilýär. Munuň özi deriniň müşremeginiň öňüni alýar.
 Gije çalmak üçin niýetlenen kofeinli kremler ýüzüň ýellenmeginiň öňüni almaga ýardam edýär.
 Gözüň aşagy halka atanda, ýaňy gaýnadylyp, sowadylan kofede ezilen pamyk bölejiklerini goýmaly.
 Kofeiniň sellýulite garşy serişdeleriniň köpüsiniň düzümine girmegi tötänden däl. Bu madda ýag öýjüklerine täsir edip, ýaglaryň eremegine (lipoliz) we olaryň organizmden daşary çykarylmagyna itergi berýär.
 Ýüzüňize gysga wagtda terlendirmek isleseňiz, kofe löderesini owradylan grek hozy bilen garyp, ýüzüňize çalyň. Barmaklaryňyz bilen ýeňiljek kakyp, onuň oňat siňmegine ýardam ediň. 10-15 minutdan soň ýüzüňizi sowujak suw bilen ýuwuň.
 Gara saçlaryňyzyň reňkini täzelesiňiz gelse, pulwizatoryň (atyrdan, gülapdan boşan çüýşäniňkini ulanaýmaly) kömegi bilen ajy demlenen tebigy kofäni sowadyp, pürküň. Saçlaryňyzy oňat darap, tä özi guraýança garaşyň.