BIR ... HEKAÝA

Ol heniz 18 ýaşyndady, emma ömrüniň soňky pursatlaryny ýaşaýardy. Bejergisi mümkin bolmadyk rak keseli bilen keselläpdi. Özüni gahar bilen öýüň içine oklapdy. Köçä çykmaýardy. Ejesi, birem özi...
Bir gün özüni hasam ýalňyz duýdy, çydamady, oklady özüni köçä. Ýaňy CD (disk) satan dükany yzda galdyrypdy welin, bir salym durdy. Yzyna öwrüldi, gapydan içeri girdi, gözüne perişde ýaly bolup görnen ýaş gyza ýene-de bir gezek seretdi. Özüniň ýaşdaşydy satyjy, ajaýyp gyzdy. Hany ilkinji bakyşdaky söýgi diýýärlere, edil şonuňky ýaly aňkarylyp galyberdi. Içerik girdi. Gyz ýylgyryp ýöredi oňa tarap we: “Size nähili kömek edip bilerin?” diýdi. Nähili ýylgyryşdy ol... edil şol pursat gujaklap ogşamak isledi ony. Sakawlandy, soňam diňe “H...o...w...a...” diýmegi başardy. Duş gelen bir CD-ni görkezip: “Howa... Şu CD”...
Gyz CD-ni alyp, içeri girdi. Az wagt soňra CD-ni bir pakedä salyp getirdi. Paketi alyp, dükandan çykdy-da, öýüne gaýtdy. Pakedi açman şkafyna oklady. Ertesi irden gitdi, ýene-de şol dükana. Ýene bir CD görkezdi gyza, alyp öýüne getirdi we oklady pakedi şkafyň içine, ýene-de açman...
Günler alnan CD-ler bilen geçýärdi. Göwnündäkileri gyza aýtmakdan çekinýärdi. Ahyry ejesine aýtdy. Ejesi: “Bar gürleş oglum, näme bar munda” diýip, ogluna göwünlik berdi...
Ertesi irden bar edermenligini jemläp dükana gitdi. Bir CD-ni saýlady. Gyz gülüp ony alyp, arka tarap geçdi, CD-ni pakedä salmaga. Gyz içerdäke bir kagyzjagaza: “Siziň bilen bir agşam duşup bilerismi?” diýip ýazdy-da, aşagyna telefon nomerini hem goşup, belligi seýfiň ýanynda goýdy gizlije. Soňra bolsa paketi alyp çykdy dükandan.
Iki gün soňra öýüne telefon geldi. Ejesi aldy trubkany. Jaň edýän gyzdy CD dükanyndaky. Ýaş oglany sorady. Kagyzjagazdaky ýazgyny ýaňy tapyp okapdy. Ejesi aglaýardy: “Näme eşitmediňizmi?” diýdi, “dün oglum dünýäsini çalyşdy”.
Märekeden birnäçe gün soňra, ejesi oglunyň otagyna giripdi ahyry. Içersini tertipleşdirmelidi. Şkafy açdy. Içine oklanan açylmadyk birnäçe pakete duşdy. Paketleri aldy, oglunyň ýatagyna oturdy we birini açdy. Içinde bir CD bardy, birem kiçijik bellik: “Salam. Siz şeýle bir mylaýym ekeniňiz... Has ýakyndan tanamak isleýän sizi. Bir agşam duşup bilerismi? Söýgüler... Aýgül...”
Ejesi ýene bir paketi açdy... Onda hem bir CD we bir bellik bardy: “Siz hakykatdanam bir mylaýym birisi ekeniňiz, hany meni bu gün duşuşyga çagyryň ahyry... Söýgüler... Aýgül...”
Unutmaň... Pikir edeniňizi hökmany ýagdaýda aýdyň... Birini söýýän bolsaňyz, aýdyň oňa... içiňizdäkileri aýtmakdan çekinmäň. Biri hakynda näme duýýan bolsaňyz aýdyň oňa... We edil şu wagt aýdyň... Şu wagt...
Çünki, dogry wagta garaşyp we “Ine edil şu pursat” diýseňiz, bir seredersiňiz eýýäm giç bolupdyr... Wagtyňyza eýe boluňlar-da, puşmanlyk bilen ýaşamaňlar. Hemmesinden iň möhümi, dostlaryňyza, söýýänleriňize, maşgalaňyza hemişe ýakyn duruň...
“Seni söýýärin” diýmekden hiç, emma hiçem çekinmäň hem-de unutmaň!.. Ýaşaýşy ýaşamaga höwesli edýän söýgüdir.