Allanyn beren nygmatynyn gadryny bilmelidir!!!!!!

Муса Пыгамбериң вагтында бир гарып бар экени. Онуң чага-чугасы, оглан-ушагы көп болансоң, гүн оңшугы зордан гечйәр экени. Шол бичәре гүнүнден налап, дат эдип, гаты аглап, Муса Пыгамбериң янына баряр:
-Я Ресулаллах! Мени гарыплык гаты песе дүшүрди. Гүн оңшугым айлананок. Сен маңа бир дога эт. Алла мениң оңшугыма бир гиңишгенлик берсин-диййәр. Шонда Муса Пыгамбер Алладан диләп:
-Эй, Ребби Худай! Шу бендәң бир гарып. Гүн оңшугы гечмейәр, сен бир рехим эдип, гиңишгенлик этсең. Шунуң оңшугы бир говуланса-дийип, Аллаха ялбаряр. Шонда Алла Тебәрек ве Тагала:
-Эй, Муса! Сен ол бендәме айт. Мен онуң өмрүниң ярысында оны бай этҗек, ярысында гарып этҗек. Озал мен булары такдырда шейле яздым. Ол өмрүниң хөкман ярысында гарып болмалы, ярысында бай болмалы. Йөне инди өз ыгтыярында, өмрүниң озалкы ярысында бай болайын дийсе, бай эдейин, соңкы ярысында бай болайын дийсе, соңкы ярысыны бай эдейин. Инди хайсыны сайласа сайласын-диййәр. Хезрети Муса алейхис салам гелип яңкы гарыба:
-Эй, бенде! Худай Тагала шейле буйрук этди. Сениң инди өз ыгтыярыңда, өңүнчә байлыгы алҗакмы я гарыплыгы алҗакмы?-дийип сорады. Онда ол гарып:
-Мен гидип оглан-ушагым билен геңешейин-диййәр. Шондан соң барып аялыны, оглан-ушакларыны үйшүрйәр ве олара:
-Алла бизиң өмрүмизиң ярысыны гарып, ярысыны бай эдйәр. Инди сиз хайсысыны өңүрти алҗаксыңыз?-диййәр. Оларың хеммеси:
-Өңүрти байлыгы алмалы-диййәр. Онда бу адам:
-Эй, машгалам, эй огул-гызым! Өңүрти гарыплыгы алалың. Гарыплыкдан соң гелен байлыгың хөзүри говы боляр. Онсоңам яш вагтымызда өмрүмизиң башында гарып-да болсак оңарыс, ишләрис, кирей эдерис. Гүйчли вагтымыз өңүрти бизе гарыплык кын болмаз. Өвренишен задымыз. Эмма өңүрти бай болуп, соңундан гарып дүшсек, ол гарыплык бизе гаты агыр гелер. Хөзүрден соң бир кынчылыга чыксак, гаты агыр гелер. Ене-де өмрүмизиң соңы гарраян вагтымыз, гүйч гачан вагты. Ол вагт ишлемек-де, гезмек-де бизе гаты кын болар. Гелиң, сиз кын гөрмәң, гарыплыгы өңүнчәк алалың, бизе ондан соң байлык гелсин-диййәр. Буларың хеммеси:
-Ёк, бу айдяның дәл, хөкман өңүрти байлыгы ал-диййәрлер. Шонда пахыр начар болуп гидйәр. Барып Муса алейхис салама:
-Ай, Муса! Биз-ә маслахат бирикдирип, өңүрти байлыгы алмалы болдук-диййәр. Шонда Алла Тагала Муса алейхыс салама:
-Шу бенде 80 яшаҗак. 40 йыл бай, 40 йыл гарып болҗак-диййәр. Муса алейхыс салам-да:
-Боляр-диййәр. Өңүрти байлыгы алансоң, байлык муңа гелип башлаяр. Думлы-душдан гелйәр. Гум дийип гарбаны гызыл боляр. Инди өй эсбапларыны үпҗүн этмек үчин бирнеме пул элине алып, базара гидйәр. Өзүне, аялына, чагаларына эгин-эшик, өй-эсбап, гап-чанак алып гелйәр. Гелен вагтында аялы:
-Сен бу затлары нәме үчин азаҗык гетирипсиң. Бу диңе бизиң ичеримизе болҗак затлар, ханы гоңшыларымыза. Ол гоңша ёк, оңа ёк, муңа ёк. Муның-а болмады. Бар гит, тәзеден зат гетир. Буларың хеммесини төверегимиздәки гоңшуларымыз билен ийип-ичмели-диййәр. Бу адам гоңшуларына-да, өзүне алан зады ялы зат аляр. Онсоң аялы:
-Хер вагт өе бир зат гетирсең, 4 төверегимиздәки гоңшуларымыза-да гетир. Эгер олара гетирмеҗек болсаң, өе-де гетирме-диййәр. Онсоң буларың дүзгүни шу боляр. Хер тарапындан 20 өй, җеми 80 өй болуп үйшүп, биле ийип-ичйәрлер. Хер нәме алса, шолара-да аляр. Ине, бу адам яшаберйәр. 40 яшдан гечди. Дөвлети ырылмады. 50 яшады. Ене дөвлети ырылман баряр. 60 яшап гечди, ене дөвлети ырылман баряр. Муса алейхис салам Алладан:
-Я Ребби Худай! Сениң карарың бейле дәлди. 40 йылдан соң буларың дөвлетини элинден алмалыдың. Гарып галмалыды. Бу нәме дийип хениз хем дөвлети ырылман баряр?-дийип сораяр. Онда Алла Тебәрек ве Тагала:
-Эй Муса! Мениң адатым хайсы бир бендәме мен рысгал берсем, ол бендәм-де эли ачык болса, халка харч эдйән болса, сахылыгы бар болса, хайыр-ыхсаны кән болса, хич вагт онуң дөвлетини элинден алмарын. Мен гысганч адамың, хайыр-сахавады ёк адамың, зекат чыкармаян адамың, хич киме рехим этмейән адамың элинден дөвлетини аляндырын-диййәр. Хатда Алла Тагала Куръаны-Керимде: «Эгер мениң берен ныгматымың гадрыны билсеңиз, мен ныгматымы өңкүден-де артдырарын, эгер ныгматымың гадрыны билмесеңиз, мен ныгматымы элиңизден аларын ве азабым сизе гаты эрбет болар»- диййәр.