“Favicon” näme?

“Favicon” (“favorites icon” sözüniň gysgaldylan görnüşi) , şeýle hem “page icon” diýip atlandyrylýan şekiljik web saýtlar, web sahypalar bilen aýrylmaz bagly bolup durýar.
Web dizaýnerler internet sahypasyny taýýarlanda bezeg, gelişik, özüne çekijilik üçin kiçijik şekiljik, ýagny “favicon” hem taýýarlasa sahypa örän owadan bolýar. “Favicon” diýilýän şekiljigi “Internet Explorer”, “Firefox”, “Mozilla”, “Opera”, “Google Chrome”, “Safari”, “iCab”, “AOL Explorer”, “Epiphany”, “Konqueror”, “Flock” ýaly soňky çykan web browzerleriň ählisi tanaýar.
Web browzerler “favicon” şekiljigini “URL” salgysy ýazylýan penjerede, ýagny web saýtynyň adynyň çep gapdaljygynda, şeýle hem “bookmark” diýilýän ýerde we sahypalar “tabbed” görnüşinde duran mahaly görkezýär.
“Favicon” şekiljigi dürli surat formatynda bolup biler, emma “Internet Explorer” browzeri diňe “.ico” formatyny tanaýar. Şol sebäpden hem adaty “favicon”-yň formaty “.ico” bolup durýar.
“Favicon” şekiljiginiň esasy wezipeleriniň biri hem web saýtyň maksadyny belli etmegidir we kärhanaňyzyň, iş ýeriňiziň tagmasyny, simwolyny suratlandyrmasydyr. Meselem, kitaphana üçin web saýt ýasasaňyz, “favicon”-y kitap şekiljiginde goýsaňyz örän ýerlikli bolar. Ýa-da derman satýan saýtyňyz bolsa, haç şekiljigi ýa-da dermanyň şekiljigini goýup bilersiňiz. Adam şekiljige seredende eýýäm web sahypanyň manysyna, ýerine ýetirýän işlerine düşünip bilýär. Şol sebäpden hem “favicon” şekiljigini web sahypalarymyza ýerleşdirmegimiz örän amatly bolup durýar.

“Favicon” şekiljiginiň ýasalşy we web sahypa ýerleşdirilşi:
1.“Photoshop” maksatnamasy ýa-da ikon şekiljigi ýasaýan programmada 16x16 (pixels) ululykda bolan şekiljik ýasap, ony “.ico” formatynda kompýuteriňiziň huşuna salyň (“save”).

2.Ýasanşekiljigiňizi “index.html” faýlynyň ýanynda, ýagny web saýtyňyzyň durýan bukjasynda, başgaça aýdanymyzda kök bukjanyň (“root folder”) içinde goýuň.

3.Haýsydyr bir web sahypaňyza ýasan şekiljigiňizi ýerleşdirmek isleseňiz, web sahypaňyzyň içinde, “<head> </head>” kodlaryň arasynda şu aşakdaky kody ýazmaly:

<link rel="shortcuticon" href="favicon.ico" type="image/x-icon">

4.Ýokarda ýazan kodymyzdaky href = “favicon.ico” diýilýän ýerde “favicon”- ýasan şekiljigimiziň ady. Şekilimize özümizçe başga-da at goýup bileris. Meselem, href= “surat.ico”. Emma adaty ýagdaýda ähli professional web dizaýnerleriniň şekiljige goýýan ady “favicon”-dyr. Kodymyzyň galan ýerleri adaty, üýtgewsiz ýazylýan ýerlerdir.

Şeýlelikde, “favicon” şekiljigini ýasamagy öwrendik. Käbir web dizaýnerler şol şekiljigi sahypa ýerleşdirmegi ýatdan çykarýarlar. Bu ýagdaýda sahypa kän bir gelşikli bolanok, emma şekiljigi ýerleşdirseňiz, sahypaňyz özüne köp adam çeker, bezegi birneme owadanlaşar we web saýtyňyzyň manysyna adam şekiljige seredende düşünip biler.

Peydalyja mowzukmay?

Ay yok dost, onem bilyadim bu zatlary!(30%, 3 adam)

Otdushi mowzuk, bet maglumat! Thanks!(70%, 7 adam)