Gysgajyk oýlanma

Herki zadyň bir başlangyjy bar. Ynsan ömrüniňem, onuň duýgularynyňam başlangyjy…
Hawa, Saňa bolan yşgymyň hem bir başlangyjy bar. Emma, Sen o wagtlar meniň bu nepis duýgymy duýardan kiçiräkdiň. Sen on bäş ýaşayňy hem doldurmandyň. Meniň hereketlerim Saňa geň görünýärdi, boluşumy ýadyrgaýardyň. Maňa jan alyjy gözleriň bilen garaýardyň. A men bolsa, Seniň ol garaýyşlaryňdan many aňlamaga çalyşyýardym. Sebäbi Sen meniň yşgymdyň, men Seniň aşygyňdym. Sen bolsa bu sözleriň manysyny o wagtlar diňe bir sözlüge seredip biläýmeseň, biljek gümanyň ýokdy. Saňa düşündirenem bolmandy. Gaýtam meni ýazgarýardylar. Meni Saňa ýamanlap, yşgymyň köküne palta urýardylar. Men bu bolýanlara parhly çemeleşýardim. Polat ýenjilip taplanýar ahbetin, yşgym hem kämilleşer öýdýärdim. Sen muny hem duýmadyň. Gaýtam meniň bu awara halymdan lezzet alýardyň…
Şindi-şindilerem ýalňyz pursatlarymda şol yzda galan günlerimi ýatlaýan hem-de çüwmedik söýgümiň hasratyny çekýärin. Her gezek ýatlanymda bolsa şahyryň diýişi ýaly örän tämiz gussa kalbyma dolýar.