FIFA reýtinginde Gollandiýa sanawyň täze lideri

Halkara futbol federasiýasy (FIFA) jemi 206 döwletden ybarat bolan Milli ýygyndylaryň awgust aýy boýunça nobatdaky reýtingini yglan etdi. Täze reýtingde öňki aýlara seredeňde aza-owlak üýtgeşmeler hem boldy.

Birnäçe wagtlap liderligini hiçkime bermedik, ýewropanyň we dünýäniň soňky çempiony, häzirki wagtda dünýäniň iň güýçli Milli ýygyndysy diýlip kabul edilýän Ispaniýa bu aýky sanawda öz ornuny dünýä ikinjisi Gollandiýa bilen çalyşmaly boldy. Reýtingde 1-njy orny Ispaniýadan alan Gollandlar bolsa bu arzyly ýere taryhlarynda ilkinji gezek geçmegi başardylar. Sanawyň 3-nji ornuna bolsa Germaniýalylar ymykly ornaşana meňzeýäler. Olar bu ýeri eýýäm birnäçe aý bäri hiç kime bermän gelýärler.

Sanawda 4-nji orny geçen aýy 6-njy ýerde geçiren Angliýalylar eýelemegi başardylar. Sanawyň 5-nji ornyny bolsa, iýul aýynda Kubok Amerikany alandan soň bu orna geçmegi başaran Urugwaý eýeleýär. Sanawyň 6-njy ýygyndysy bolsa, Angliýa bilen ýerini çalşan Braziliýaň Milli ýygyndysy. Geçen aý sanawda 8-nji ýer alan Italiýanlar, bu aý Ispaniýa bilen geçiren ýoldaşlyk duşuşygynda ýeňiş gazanmaklaryndan soň bir basgançak öňe süýşüp, awgust aýynyň sanawynda 7-nji orna ýerleşmegi başardylar. Şeýle-de bu sanawda Ronaldoly Portugaliýa 8-nji, Messili Argentina bolsa 9-njy orny eýelemegi başardylar. Sanawda ilkinji onlugyň soňuny Horwatiýanyň Milli ýygyndysy jemledi.

Awgust aýynda birden 5 basgançak öňe süýşmegi başaran Rossiýa sanawda 13-nji, Fransiýa (öz balet edýän ýygyndym) üç basgançak yza süýşüp sanawda 16-nji, Türkler bolsa geçen aýky ýerini gorady we sanawda 24-nji orny eýelediler. Kubok Amerikda final oýnan Paragwaý sanawda 25-nji ýerde özlerine orun tapdylar. Şeýle-de bu sanawda Aziýadan iň öňdäki ýygyndy Ýaponiýa (15-nji ýer) bolmagy başardy. Sanawda Cot d'Ivoire (17-nji ýer) afrikalylaň lideri, Meksika (20-nji ýer) D.g. Amerikanyň lideri, Täze Zelandiýa (93-nji ýer) bolsa Okeýaniýanyň lideri bolmagy başardylar.

Bu aýdaky sanawda iň gowy çykyş görkezen ýygyndy birbada 18 basgançak öňe süýşüp 181-nji ýere ýerleşen Seýşeller. Iň erbet düşüşi bolsa birbada 14 basgançak yza süýşen ýygyndylar MAR (103-nji ýer) hem-de Sierro Leon (107-nji ýer) dagylar boldular.

Biziň Milli ýygyndymyz Türkmenistan bu sanawda jemi 179 oçkosy bilen, geçen aýdaky 144-nji ýerinden 3 basgançak öňe, 141-nji ýere süýşmegi başardy. Sanawda gezip ýören ýerimizi görsem ýürekden tutjak bolýar. Žalka, biz ýaman yzda. Bizi dünýä çempionatynyň saýlama oýunlaryndan düňderen Indoneziýa bolsa sanawda 6 basgançak öň süýşüp 131-nji ýere ýerleşdi.

Sanawyň soňky orunlaryny bolsa Amerika Samoasy, Andorra, San Marina, Montserrat ýaly döwletler eýeledi. Bu gidiş bilen bahym bizem şu töwereklere geçeris..

Sanawy doly görmek üçin www.fifa.com kömek eder.
Sag boluň.