FC Porto ýaly akylly klub ýok, bolaram öýdemok

Ispaniýanyň Atletico Madrid futbol topary düzümindäki esasy hüjümçisi Kun Agüerony Angliýanyň Manchester Citi futbol toparyna satandan soň, Agüeroň ýerini dolduraýjak hüjümçi transfer etmegiň ugruna çykypdy. Olar Portugaliýanyň Porto hem-de Kolumbiýanyň Milli futbol ýygyndysynda çykyş edýän Radamel Garcia Falcao Sarateni transfer etmek üçin birnäçe wagtlap gepleşikler geçirdiler. Geçirilen gepleşikler bolsa öz netijesini berdi. Atletico Madrid Portodan Radamel Falcaony 40 million € transfer etdi. 25 ýaşyndaky Falcao 2016-njy ýylyň tomsuna çenli Atletico Madridde çykyş eder.

10 ýaşynda futbol oýnamaga başlan Falcao professional futbolçylyk karýerasyna 2005-nji ýylda Argentinanyň River Plate futbol klubynda başlady. Ol ýerde Argentinanyň çempiony bolmagy başardy. 2009-njy ýylda esasy hüjümçisi Lisandro Lopezi Fransiýanyňy Lion futbol toparyna satan Porto, Radamel Falcaony River Plateden 5,5 million € transfer etdi. Ol Porto karýerasynda Portugaliýanyň çempiony bolmagy, Portugaliýanyň Kubogyny we Portugaliýanyň Super Kubogyny eýelemegi başarýar. Geçen sezon bolsa Porto bilen UEFA Euro League-ni eýelemegi başardy. Ol ýerde bolsa 15 oýunda 17 gol salyp, UEFA Cup/UEFA Euro League taryhynda bir sezonda iň köp gol salan Germaniýaly Jürgen Klinsmanyň 15 gollyk rekordyny täzeledi. Falcao Portoda hüjümde bile oýnaýan jübüti Hulk bilen bilelikde geçen sezon jemi 72 gol salmagy başardylar. Bu bolsa ýewropada geçen sezon iň köp gol salan jübütler diýmek bolýar. Ikinji ýer Ronaldo bilen Özildi (61 gol). Falcao futbolçylyk karýerasynda River Platede 88 oýunda 34 gol, Portoda bolsa 50 oýunda 41 gol salmagy başardy.

Falcao täze klubynyň hüjüminde ýene bir özi ýaly güýçli hüjümçi, soňky dünýä çempionatynyň iň gowy futbolçysy Diego Forlan bilen bilelikde oýnar. Ýöne Forlanyň klubda galjagy galmajagy näbelli. Şu günler Italiýanyň Inter hem-de Rossiýanyň Zenit futbol toparlary Forlany transfer etmek üçin başagaý bolşup ylgap ýörler.

Şu temada Falcaony 40 million € satan Porto barada gyzykly maglumat ýazmakçy.
Portonyň Barcelonaňky ýaly dünýä belli ýyldyzlary çykarýan futbol mekdebi ýok. Real Madrid, Machester Citi we Chelsea ýaly dünýä ýyldyzlaryny transfer etmek üçin ýüzmillionlarça euro çykaranok. Ýa-da Manchester United ýaly dünýäniň 4 tarapynda janköýeri bolan beýik klub däl. Emma Porto bulardan tapawutlylykda futbolçy transfer etmekde ýewropada, belkide dünýäde iň girdeýjili klub. Ol satyn alan zadyny ýyldyz edip ýetişdirýär we 5 esse, 10 esse, 100 esse gymmat edip satmagy başarýar. Falcaony 5,5 million € satyn aldy, 40 million € satdy we bu futbolçyň transferinden 34,5 million € gazandy. Diňe Falcao däl. Klubyň soňky 5-10 ýyllykdaky transferleriniň haýsyna seredeňde-de gymmat alyp arzan satan ýeri ýok. Klubyň bu üstünlikli sistemasynyň arkasynda bolsa, Latyn Amerikda hem-de Portugaliýanyň ligalarynda güýçli, talantly futbolçylaň mydama gözleginde gezýänleriň (Razwedçik diýilýämi şolara?) paýy uly. Olaryň tapýan futbolçylary bir tarapdan kluba uly girdeýji getirse, beýleki tarapdan 2003-däki UEFA Cup, 2004-däki Champions League, 2011-däki ýaly UEFA Euro League kuboklaryny getirýär. Geliň şoň üstünde azjyk durup geçeliň.

Pepe
Satyn alynan bahasy: 1 million €
Satylan bahasy: 28 million €
2004-nji ýylda Maritimodan bary-ýogy 1 million € transfer edilen Pepe 2007-nji ýylda Portodan Reala 28 million € transfer boldy. Häzirki wagtda bolsa ol dünýäniň iň güýçli goragçylarynyň biri.

Lisandro Lopez
Satyn alynan bahasy: 3 million €
Satylan bahasy: 20 million €
2005-nji ýylda Argentinanyň Racing futbol toparyndan 3 million € Porto transfer bolan bu futbolçy, 2009-njy ýylda 20 million € Fransiýanyň Lion futbol toparyna satyldy. Ol Portodadaky 4 ýyllyk karýerasynda 106 oýunda jemi 100 gol salmagy başardy. Nähili güýçli hüjümçidigini arada Lion-Rubin oýnanda hem görensiňiz.

Ricardo Carvalho
Satyn alynan bahasy: Mugt
Satylan bahasy: 22 million €
Jose Mourinhonyň iň gowy görýän goragçylarynyň biri bolan Carvalho 1996-2004-nji ýyllarda Portoda çykyş etdi we 22 million € Portodan Chelsea transfer boldy. Ol öňki Portodaky ýoldaşy Pepe bilen bilelikde, häzirki wagtda Jose Mourinhonyň tälimçiligindäki Real Madridiň esasy goragçylary bolup durýarlar.

Jose Bosingwa
Satyn alynan bahasy: 1 million €
Satylan bahasy: 19 million €
2001-njy ýylda Porto klubyna 1 million € transfer bolan bu futbolçy, 2008-nji ýylda Londonyň Chelseasyna 19 million € transfer boldy.

FC Porto bulardan başga-da Deco, Quaresma, Anderson, Lucho Gonzales ýaly futbolçylarynyň transferinden hem jemi 50 million € gowrak girdeýji gazandy. Bolýar, bular-a futbolçy diýeli. Olar iň bärkijesi FC Portolylara geçen sezon UEFA Euro Leagueny alyp beren ýaş tälimçisi Andre Villas Boasy hem Chelsea mugt bermediler. Villas Boasy öz komandasynda görmek islän Abramowiç, bu tälimçi üçin Porta 18 million € tölemeli boldy.

Portolylaryň bu üstünligi diňe bir özlerine girdeýji getirmän, eýsem dünýä futbolyna hem birnäçe ýyldyzlary goşýar. Deco diýjekmi, Calrvalho diýjekmi, Pepe diýjekmi, Quaresma diýjekmi, Lopez diýjekmi, Falcao diýjekmi, umuman sanasaň sanap oturmaly. Ýa-da Jose Mourinhony alaly. Häzirki wagtda dünýäniň iň güýçli trenerleriniň biri diýlip kabul edilýän Mourinhonyň hem Portoda ýyldyzy parlan tälimçidigini hemmämizem bilýändiris.

Häzirki wagtda Falcaonyň gitmegi bilen klubda lider bolup galan Hulkyň hem ýakyn wagtlarda FC Porto klubyna uly girdeýji getirmegine garaşylýar. Ýeri gelende ýatladaýyn, Portoly Hulk Mano Menezes tarapynda ýakyn günlerde Gananyň Milli ýygyndysy bilen ýoldaşlyk oýnuny oýnajak Braziliýanyň Milli ýygyndysynyň düzümine çagyryldy. Hulkdan başga-da häzirki wagtda Portoda oýnaýan Fredy Guarin, João Moutinho, Rolando, Álvaro Perreira, Fernando, Steven Defour ýaly ýaş futbolçylar ýewropanyň birnäçe güýçli klublarynyň transfer etmek isleýän futbolçylarydyr.

Klubyň ýene bir aýratynlygyny halaýan. Bu klub hiç haçanam bir futbolça ýa-da bir trenere bagly bolýan klub däl. Käbir klublar bar, komandaň lideri ýa-da tälimçisi gitse, şolaň gidenligi bildirýär, ýagny klub azda-kände peselýär. Porto welin beýle däl.

Bir deňeşdirme ýazaýyn. Real Madrid transfer üçin ýüzmillionlarçalap pul çykarýar, öz düzümine birnäçe ýyldyz futbolçylary satyn alýar, dünýäniň iň güýçli tälimçilerini komanda getirýär. Netijesi nähili? Eýýäm 9 ýyl bäri ýewropada hiç-hili kubok alyp görenoklar. Indi FC Porto-a geçeli. Porto tranfer üçin ýüzmillionlarçalap pul çykaranok, öz düzümine birnäçe ýyldyz futbolçylary satyn alanok, emma öz futbolçylaryny ýyldyz edip ýetişdirýär, dünýäniň iň güýli tälimçilerini komanda getirenok, emma Jose Mourinho ýaly tälimçileri dünýä futbolyna goşýar. Netijesi nähili? Soňky 8 ýylda ýewropada 3 gezek (UEFA Cup -2003; UEFA Champions League - 2004; UEFA Euro Legue - 2011) kubok almagy başardylar. Porto bu sanawyna şu aýyň 26-syna belki ýene bir kubok (UEFA Super Cup - 2011) goşar.

Vítor Pereiranyň tälimçiligindäki FC Portodan janköýerleri bu ýyl hem ýeňişlere, çempionlyklara garaşýarlar. Porto aýyň 26-syna UEFA Super Cup 2011 eýelemek üçin Çempionlar ligasynyň soňky eýesi Barcelona bilen duşuşar. Ondan soň kluba çempionat Portugaliýa we Çempionlar ligasy garaşýar. Meň öz pikirimçe, FC Porto şu ýyl Çempionlar ligasynda 1/4 finaly ysgap gaýdar. Belki çempion bolar, belkem bassyr ikinji gezek UEFA Euro League-ni alar. Portonyň bu sezon nämeler başarjakdygyny bolsa diňe wagt görkezer. Emma bir zat aýdaýyn, FC Porto ýaly akylly klub ýok, bolaram öýdemok.

Bu ýylky transfer möwsüminde iň gymmat 10 transfer häzirlikçe aşakdakylar. Haýsysy bahasyna degenok?

Kun Agüero - 45 million €(22%, 6 adam)

Javier Pastore - 43 million €(29%, 8 adam)

Radamel Falcao - 40 million €(0%, 0 adam)

Fábio Coentrão - 30 million €(22%, 6 adam)

Cesc Fabregas - 29 million €(3%, 1 adam)

Alexis Sánchez - 26 million €(0%, 0 adam)

Zlatan Ibrahimovic - 24 million €(7%, 2 adam)

Steward Downing - 23 million €(3%, 1 adam)

Manuel Neuer - 22 million €(0%, 0 adam)

Romelu Lukaku - 22 million €(11%, 3 adam)