Şu günüň söýgüsi hakynda

Çöl beýewanda Mejnun çägäň ýüzüne Leýliň adyny ýazýar. Ýazany şemala bozulýar. Ol ýene ýazýar. Ýene bozulýar. Ýene ýazýar. Ýazmakdan ýadamaýar. Ýadamak nire munuň bilen ýaşaýar...
Her kim şeýle söýgüni küýseýär her kim şeýle aşyklygyň arzuwynda. Ýöne pikir edip gördüňizmi Leýli diýip Kaýs däli-mejnun bolýar, Perhat Şirin diýip daglary gazýar, Şasenem şa gyzy halyna bir garyp oglana aşyklygynyň derdini çekýär. Ýedi aşygyň ählisinde-de ejir bar, horluk bar. Özüňiz ýaşkaňyz şeýle aşyklygy arzuw edenem bolsaňyz, öýeräýmeli ogluňyzyň bir gyz diýip dälliräp çöle çykanyny islärmisiňiz? Ýa-da gyzyňyzyň siziň halamajak içeriňizden bir ýigit bilen durmuş gurmagyna razy bolarmysyňyz? Ilçilikdir bu sowallara «Hawa» diýjeklerem tapylar, ýöne köpçülik biraz ýaýdansa gerek. Belki, iň ýamany, bu meseläni öz öňüňde şeýle kesgitli edip goýmazlykdyr?!
Ýaşlarymyza gezek gelende, öz söýeni üçin mejnundanam aňyrda bolup bolýan zat bar bolsa ýaýdanmajaklary gürrüňsiz. Onsoň olara bu meselede bir zat diýmek diňe gadryňy gaçyrmak bolar. Bu howpa düşünsemem olara ýüzlenmän durup bilmedim. Goňşymyň oglundan, elbetde edebiýatdan habarly ýigitden näme üçin klassyk edebiýatymyzda söýgiň gapdalynda ejir bar diýip soradym. Ol maňa «Şol döwürlerde söýgiň ejirsiz bolmandyr, häzir edil beýle däl» diýen manyda jogap berdi.
(Geliň, indi sorag-jogaba hemmämiz goşulalyň.) Onda söýgem döwrüne görä bolýar-da? Bedew at münüp ýörenleriň söýgüsi bir başga, «BMW» münüp ýörenleriň söýgüsi bir başga? Goňşy ýigit ýylgyrsa-da böwrüni diňledi. Soňam «Häzirki döwürde şeýle söýgüler ýok, ýa-da ony şeýle güýçli beýan edip bilýänler ýok. Kerim Gurbannepesowyň «Söýgi dramasy» ýa-da Gurbannazar Ezizowyň «Söýgi» sonetler çemeni bolaýmasa». Men goňşy ýigidime edebiýadyň, şahyrlaryň däl-de söýgiň gürrüňini etmekçi bolýanymyzy ýatlatdym. Sen hakyky aşygy gördüňmi diýip soradym. Goňşym «hawa» diýip bilmedi.