Aýralyk...

Aýralyk.
Ömürlik öňüňde boldum men asy.
Ajy gözýäş döküp, agraldy derdim.
Ýere çalyp kän edilen yhlasy,
“Öt günämi” diýip, saňa ýalbardym.

Ähli süýji arzuwlarmy, wepamy
Günäm hasap etmäge – de häzirdim.
Biparh bakyp, çeken jebri – jepamyň
Baryny yzyna gaýtaryp berdiň.

Adamlary tanamaga irdir – le!
Hem olary ýamanlykda görmäge.
Ýa ir dälmi, sowuk tekepbirligňe
Öz ýälňyz bagtymy gurban bermäge?

Şeýle boldy! Baky hijrany indi
Öz alnymda görüp, galdyraýaryn.
Seniň buza dönen sowuk ellerňi
El däl, ataş bilen gysýaryn, ýarym.

Arzuwym: men hakda ýatlama, saňa
Del adamlaň ýanda, saýry bir ýerde
Arman çekdirmesin, salmasyn gama
Hem heläk etmesin, goýup ýok derde...
Mihail Lermontow.

Terjime: Atamyrat Atabaýew.

***

Aýralyk pursady
Sen gitdiň.
Şo pursat boşady ruhum,
Hemme zat manaysyn ýitirdi birden.
Şatlygym galmady, batgtym galmady,
Şo pursat bar zady uçurdy serden.

Daglarym peseldi baglarym bile,
Şemalym sowulyp duşumdan ötdi.
Boşap galdym misli gaşsyz diwala,
Okan kitaplarmyň manysy ýitdi.

Hatda öz ruhuňam aldyň – da gitdiň;
Göz, gaşyň, egniňi gözden salamok,
Ýöne olaň baryn öňki bolşy deý, <
Seniň syratyňda jemläp bilemok.

Çasly çeşmelerim akýar tersine,
Tersine ýaňlanýar aýdymym sazym.
Seniň barlygyňda – meniň baýlygym,
Bir pursatda garyp galdym, ezizim.
Gurbannazar Ezizow.

***

Maňa tarap uzamasyn gollaryň,
Ölemden soň
Sowukdyryn.
Umyt edip, deňşirgenip, goýma
Gulagyň.
Diýme pyşyrdar.
Gury ýapraklar ýerde
Şygyrdar.
Dilim – dilim pyntyklary,
Bahardyr açan.
Şol pyntyklar dälmidir,
Bu güýzde
Saralyp gaçan?
Duşusykd gerilmedik gujagyň,
Aýralykda gözýaşyna
Ynanylmaz hiç haçan.
Ölemden soň
Sowukdyryn.
Uzamasyn maňa tarap gollaryň,
(Neneň oňat!)

Sowukdyryn. Sowukdyryn...

Ylyas Amangeldi.