Роваят.......

Гүнлерде бир гүн Пыгамбер
саллаллаху алейхи веселлем: «Эй, аяллар! Сиз садаканы кән бериң ве Алладан
эден гүнәлериңизден кән тоба диләң! Мен җәхеннемде янян адамларың көпүсиниң
аяллардыгыны гөрдүм»-дийди. Җебрайыл перишде Пыгамберимиз саллаллаху алейхи
веселлеми Маграҗа, ягны Алланың хузурына әкиденде, Пыгамберимизе довзахы-да,
җеннети-де гөркездилер. Шол вагт бир дилевар аял аяк үстүне галып:

  
-Я Ресулаллах! Нәме үчин довзахың көпрәги биз болярыс?-дийди.
Пыгамберимиз саллаллаху алейхи веселлем:

  
-Сиз кән гаргаярсыңыз, нәлетлейәрсиңиз. Бетдога кән эдйәрсиңиз-дийди.
Оглуңыза, гелниңизе, әриңизе, агтыгыңыза, гоңшыңыза, гарындашларыңыза кән
гаргаярсыңыз. "Хай, ер чексин", "ер ювутсын", “гыран
дегсин", "эртире чыкман өләедиң-дә", "өйүң үстүңе
юмрулсын", "гөрениң гөрги,
берениң берги болсун" ве шуңа меңзешлер. Шуларың хеммеси бетдога боляр.
"Ер чексин" дийдигиң “басымрак өләймезмикәң, басымрак өл"
дийдигиң боляр. Хер эден бетдогаңыз сизе гүнә болуп языляр. Шонуң үчин довзахда
янянларың көпүси аяллар боляр. Ене-де бир гүнәңиз әриңизиң гадрыны билеңизок.
Әриңиз сизи гейиндирйәр, ийдирйәр, ичирйәр, нәме тапса, өйүне гетирйәр. Шейдип,
сизиң угруңызда хемме ишиңизи эдип, ылгап йөрейәр. Бир тәзе көйнек чыкып,
шоны-да алып бермесе, ол гөргүлә гаргап башлаярсыңыз: "Мениң саңа гелип
гөрен задым ёк, мени якдың, вай, яндым, яндым шу түнекден"-дийип, йүрегини
агырдярсыңыз. Сизиң шу эден ишиңиз, әхли амалыңызы еле берип, сизи җәхеннеми
эдйәр. Ызындан Пыгамбер саллаллаху алейхи веселлем:

  
-Мен-ә сизден аңырда аклы кемиң,
дини кемиң, аклы кәмил, дини кәмиле үстүн чыкяныны гөрмедим. Ягны шунча аклыңыз
кем, диниңиз кем болса-да, ене-де аклы-дини кәмиле үстүн чыкярсыңыз-дийипдир.
Шонда ол дилевар аял ене-де:

  
-Я Ресулаллах! Бизиң аклымызың
нәмеси кем?-дийип сорапдыр. Пыгамбер саллаллаху алейхи веселлем:

  
-Сизиң аклыңызың кемлиги шу:
сизиң икиңиз бир шаядың ерине яраяңыз, ягны бир дава боланда я-да шуңа меңзеш
бир зада шаят герек боланда, 2 саны шаят герек: 2 эркек адам я-да 1 эркек 2 аял
адам герекдир. Ине, шуерде 2 аял бир
эркегиң ерине ярады. Алла Тагала сизиң икиңизи бир эркегиң еринде гойды. Ине,
шу сизиң аклыңызың кемлиги-дә-дийип, җогап берипдир. Онда ол дилевар аял:

  
-Бизиң динимизиң нәмеси кем? Шу
эркеге гелен дин бизиң динимиз дәлми? Динимизде нәме кемлик бар?-дийди.
Пыгамбер саллаллаху алейхи веселлем:

  
-Эркек адамың бир гүн оразасы-да
гечмели дәл, бир гүн намазы-да гечмели дәлдир. Эмма сиз бир вагт боляңыз намаз
окап билмейәңиз, ораза тутуп билмейәңиз. Гөрүм гөрйәңиз, хапаланяңыз. Ине,
шу-да диниңизиң кемлиги-дә-дийди. Онуң үчин эзиз аял доганлар! Сиз әриңизе
мәхрибан болуң. Онуң айданыны эдиң. Өйде өзүңиз хәким болҗак болмаң. Эгер
әриңиз бир эрбет адам болса, намаз окамаян, харамхор адам болса, сизе-де
шеригатың гадаган эден задыны буюрса, оны терк эдип, гулак асмасаң боляр.
Меселем, “намаз окама, ораза тутма, арак ич, бар зына эт, пул гетир ве шуңа
меңзеш затлар” дийсе, боюн болмалы дәлдир.