Kerim Gurbannepesow - Bir meýlisde

Ýaşuly, ýaş kiçi,
Birtopar kişi –
Adamdan doludy
Otagyň içi.

Boşady bäş sanak
Palawly çanak.
Çanaklaň deregne
Aýlandy çäýnek.

Gök çaýyň başynda
Gyzyşdy gürrüň:
“Plan ýerden, awdan
Gelýärdim bir gün.

Goýberdim tazyny,
Uçurdym guşy…”
Garaz, agyrdyldy
Müň gepiň başy.

Gürrüňiň az-owlak
Gaçyşyp duzy,
Anekdota ýazdy
Gürrüňiň yzy.

Onýança ýerinden turdy-da Oraz?
Diýdi: “Bolsady hem ekeliň biraz.
Ynha, bar aýdaly, meselem, häzir,
Tamyň depesinden gelip bir owaz,
“Bir uly dilegňi bitirjek!” diýse,
Näme dilärdiňiz, adamlar, eýse?

Meselem, sen näme dilärdiň, Geldi?”
-Menmi? Gök WOLGALY lotereý bildi.
-Hany diý, sen näme dilärdiň, Kemal?
-Uzyn boý, ak ýüzli bir sahypjemal.
-Ýeri, sen nämejik dilärdiň, Pena?
-Bir oguljyk bolsa, oňardym menä.
-Ýeri seň dilegiň nämedir, çakmak?
-Meňkimi? Jahana aýlanyp çykmak.
-Saňa näme gerek aý ýadaw ýigit?
-Ölýänçäm iýjegim bolaýsa mugut...
-Ýeri sen dilegsiz oňjakmy Çary?
-Bir oňat goňşynyň zary men zary.
-A-how seň dilegiň nämedir, Bäşim?
-Elliden ýigrimä geläýse ýaşym...

Garasaý ekildi bolsada bary,
Biri ömür baky ýaşlyk diledi.
Biri palowdan soň çişlik diledi
Bir ýigit (student bolara çemli)
Ertir fizikadan bäşlik diledi.

Käsi agtyk, käsi çowluk diledi,
Käsi çowlukdan soň ýuwlyk diledi.
Käsi dosty üçin saglyk dilese,
Käsi özi üçin saglyk diledi.
Biri (meger oglun öýlendirjekdir)
Gyňaçlyk on sany ýaglyk diledi.

Aý garaz hemme zat dilenip çykdy
Gök WOLGAdan başlap GYŇAJA çenli.
Ýöne weli akyl dilän bolmady...
Akyldan kösenýän ýok bora çemli.