Ýaglyk
Bugün bir gyz gördüm, başy ýaglykly
Ýeriň gaýmagyny bozman barýardy
Synlanymy duýdy, soňra howlukdy
Indi ýeri gaýmagyna garýardy
Oýlandym yzyndan garap durşuma
Ýaglyk gyza şeýle gelişjek eken
Mümkin ol oýlandy tozap barşyna
Nirden çykdyka bu "çişik ýerçeken"
Geýimleri arassadan sadady
Ýakasy we ýeňi ýerli-ýerinde
Tolgunýardy, gaty ýöräp ýadady
Gözden ýitdi bir duralgaň deňinde
Edep we ekramdan guýulan ýaly
Iň bärkisi ýöreýşi hem başga-la
Öňem bir ýaşulyň aýdyşy ýaly
Ogluň bolsa alaýmaly maşgala
Ýöräbergin uýam, tolgunma asla
Senem bir ýigidi bogarsyň yşga
Ýaglygyňy halan Serdaryň bolsa
Ýaglyklysy bolmaz gelninden başga
28.07.2011
Arhiwiň ýagdaýy
● Doly tekst
● 35/35 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 22 maý 2012 ý. · Asyl sahypany gör ↗
Teswirler 35
Gowy. Käbir yerlerinde düzedi$ girizip mazmunyny hasam gowy edip bolar.
Soňky bentde adyňy getiripsiň welin, şol hökmanmy?
Goşgyny umumylykda haladym. Berekella! Höwri köp bolsun! Dowam et!
Gowyja bolupdyr ustunikler dileyan!!!
Kerim agañ go$gusyny okan yaly boldum.Dowamly bolsun.
Adyňy ýazmasaň şahyr diýen ýaly birhili at çalyşmasy ulanmaly boljak. Olam birhili ýaly. Umuman gaty laýyk görmesemem goýdum golumy.
Goşgyňa gowy ekeni. Men kän goşgy okamasam-da şuny okadym.
Dogry bellik. Toýdan soň birhili goşgy ýadyňa düşmejek ýaly eken. Iş wagtlarynyň arasynda öňden galan bir ýarpy goşgyny düzeldişdirip ýazaýdym.
Mysal üçin?
Mysal üçin, ikinji bentde:
(Mümkin ol oýlandy tozap barşyna
«Nireden çykdyka çişik ýerçeken»)
diýilse has gowy. Şonda bogun sany deňleşýar.
Üçünji bendi şeýleräk bolsa:
(Geýimleri arassadan sadady
Şaplaşyp dur uzyn, syrdam teninde
Geýimleri arassadan sadady
Ýakasy we ýeňi ýerli-ýerinde ----Okalanok, biri-biriniň ýerine bolmajagy düşnükli ahyry
Ýene üçünji bentde
Tolgunýardy, meger eýýäm ýadady
Gözden ýitdi hol duralgaň deňinde.
Tolgunýardy, gaty ýöräp ýadady
Gözden ýitdi bir duralgaň deňinde ------- Awtor duran ýerinden anyk bilenok ahyry ýadalandygyny hem-de gümürtik bir duralga däl-de anyk duralga hakynda gürrüň ediläýse)
Dördünji bentde:
Öňem bir ýaşulyň aýdyşy ýaly
Ogluň bolsa alaýmaly maşgala
Öňem köneleriň aýdyşy ýaly
Ogluň bolsa alaýmaly maşgala
diýilse, gowy bolaýmasa.
Soňky bentde
Ýaglygyňy halan Serdaryň bolsa
Ýaglyklysy bolmaz gelninden başga -------gelin, esasan, gyňaç bilen baglanyşdyrylýar. Şeýleräk bolup biler
Ýaglygyňy halan Serdaryň bolsa
Halanjasy bolmaz gelninden başga
Ilki bilen, zähmet edip ýazanyňa Taňryýalkasyn. Örän minnetdar.
Indi jogaplarym -
Nirden çykdyka bu çişik ýerçeken - diýip gönükdirenimi gowy gördüm, ýogsam garalan wagtym seniň ýazyşyň ýaly ýazypdym. Bogun iki hili hem sazlaşýan bolmaly.
Saplaşyp dur uzyn, syrdam teninde - ajaýyp setir bolupdyr. Utanmasam alardym, ulanardym. Ýerli-ýerinde diýip aslynda bolmaly uzynlygy we giňligine bir wagtyň özünde bellik etjek boldum, meniň-ä göwnüme jaý.
Tolgunýardy, meger eýýäm ýadady
Gözden ýitdi hol duralgaň deňinde - Garalamamda şuňa gaty meňzeş edip garalapdym. (meger ýerine belki goýaýmaly). Indi pikirlenýän welin biderek çalşypdyryn. Ýerlikli düzediş.
Öňem bir ýaşulyň aýdyşy ýaly - Bärde öz durmuşyma degişli içgin bir ýatlama bar. Şol ýaşulynyň aýdan zadyna gönükdirmegimiň sebäbi şol.
Ýaglyklysy bolmaz gelninden başga - bu ýerdäki gelin, gelniň adyny goýmazlyk üçin goýlan çalyşma. Şonuň üçin düşünersiň diýip umyt edýärin.
goshgy govy bolupdyr . Osobenno da 2 bent.
Geýimleri arassadan sadady
Şaplaşyp dur uzyn, syrdam teninde
ýerine
Geýimleri arassadan sadady
Ýakasy we ýeňi ýerli-ýerinde
ikinji has ýerlikli. Sebäbi, ýokarkyda egnine şaplaşyp duran tyrryk soňky moda köýnek göz öňüne gelýär.
Ikinjide bolsa ýakaly, ýeňli we laýyjak köýnek göz öňüne gelýär.
Umuman, gaty gowy iş. 👍
Häzir biziň döwrümizde «şahyr bolçulygy, ýöne şygyr gytçylygy» bar. Beýle goşgular çykaryp bilýän oglanlara ýiti galam bilen güýç-kuwwat arzuw edäýmek galýar.
Matak, awtora ikinji görnüşde has gowy ýaraýan bolsa şeýle galdyrmak onuň öz biljek zady. Ýöne
(Geýimleri arassadan sadady, Şaplaşyp dur uzyn, syrdam teninde) diýlende «tyrryk soňky moda köýnek göz öňüne gelmeli däl, sebäbi sözüň beýle manysy ýok. SYRLAŞYP DUR diýlen bolsa başga gürrüň. Sebäbi şap bolmagyň laýyk bolmak diýen manysy bar (gyzyklansaň 1962-nji ýylda çykarylan Türkmen diliniň düşündirişli sözlügi bar, ol türkmen diliniň sözleriniň manysyny görkezýän ýeke-täk sözlük şu güne)
erbet däldi