baş salmak

“Baş salmak”<br />

Ýaz özüniň birje günün
Öňde ýygnap goýan ýaly,
“Garyplary toý güni bir
Horlamaýyn!” diýen ýaly
Bulut göçüp, ümür geçip,
Maýyl boldy şenbe güni.
Gün dogdy-da, engamlady
Garyp üýleň zömmegini.
“Şu gün ýaly bolaýsady,
Gara gyşyň hemme güni
Ýarpy-ýalta ýeňlederdi
Men ýalklaň emgegini!”
Diýen şirin arzuw bile
Dölämiziň tümmegine

Ygyş taýdan ýaplanjyrap,
Göz gezdirdim juwazyma...
Çemçe çorbaň bir çetinde
Posa batyp, igläp giden
Müçenegme, mykrazyma

Öl çägäni sürte-sürte
Kümüş ýaly güldüretdim.
Sakgalymy çürte-çürte,
Taýpy ýaly eňejigmi
Taýzardypjyk işe gitdim.

Emma şo gün toýa barmak
Nesibümde ýok ekeni:
“Kakam derrew gelsin diýýär!”
Diýip, sojap, ylgap geldi
Tilki baýyň yer çekeni.

Agyr paltaň aşagynda
Tas burulyp ýykylypdym.
Uzyn gije ojar aýryp,
Daňa golaý zordan sypdym.

Ertesi gün haýdaý-haýdaý
Üç juwazy çykardym-da,
Kör düýämi ikindinler
Ýatagynda çökerdim-de,
Her ädimde bir gaňrylyp
Dolagyma garşy-garşy,
Ökjelerim ýere degmän,
Gönüläýdim toýa garşy.

Ýetenimi duýman galdym
Gül agalaň öýlerine.
Bir seretsem, bulaň tutýan
Ýetne-ýütne toýlaryna,
Diňe düýn däl, bu agşam hem
Ilat bary üýşen eken.
Görsem, maňa baş salynýan
Hezil wagty duşan eken.

Toý tutulýan garyp öýüň
Agyp ýatyr ezenegi.
Märekäniň ýaraşygy,
Toý-baýramlaň hozanagy
Gelin-gyzlar bakjaklaşyp,
Eýeläp dur gözenegi...
A men bolsam, müň gözelden
Gözleýärdim bir gözeli.

Çöwşi ýaly asyljyrap
Zürrük öýüň eşiginden,
Üzüginiň ebşidinden,
Durlugynyň deşiginden,

Çagajyklar seredýärler
Edil dürbä bakýan ýaly.
Bu toý-şowhun jahyllaň-da
Janlaryna ýakýan ýaly,
Çagalardan pes oturman,
Ogryn-ogryn bakyşýarlar.
“Berekella,aldyň!” diýşip,
Butlaryna kakyşýarlar.

Menem baryp goşulyşdym
Jahyllaryň arasyna.
Atam bilen ýaşdaş öýüň
Ýapyşsam-da niresine,
Çüýräp giden gamyşyndan
Tutan ýerim gopup gelýär.
Işigi-de dyzaberseň
Söýesinden sypyp gelýär.

Derrew baryp çöwşiň ýandan
Kelläm sygjak deşik tapdym.
Bakanym hem şoldy weli,
Özüm duýman elim çarpdym.

Aklym alan şol gaýtarma,
Ini-boýy oýnam sere
Tilki baýyň keýwanysyn
Aýlap-aýlap çaldy ýere...
Dogumsyrap, elin çyzgap,
O çişigiň yzysüre
Ýene-de bir baý heleýi
Orta çykdy batyp dere.
Maýa ýaly bu gaýtarma
Maýalykdan dönüp nere,
Bu çişigem ýuwaş-ýuwaş
Gap böwüre süre-süre,

Dulda duran düňderilgi
Toý gazanna uruberdi.
Gelin-gyzlar öňe süýşüp,
“Iki gazan duşdy!” diýşip,
Pakyrdyny beriberdi.

Ol gaýtarma goşuldy-da
Gelin-gyzlaň arasyna,
Bir zat- bir zat pyşyrdady
Ýanyndaky jorasyna.

Öl durlugy iki ýana
Emaý-emaý çeke-çeke,
Onuň çakan çawuşyny
Eňitdim men ýeke-ýeke:

“Galyň-galyň haramhorlar
Süňňümizi gemirşip ýör.
Dabanmyzyň azabyny
Eşek ýaly sümürşip ýör.

Mal deregne ulanýarlar
Doganmyzy, ärimizi.
Şo deýýuslaň boýnundaky
Köýüp ýatan arymyzy
Şolaň çişik aýalyndan
Üzülipjik delil bile,
Bir zajyk şatlanmasak,
Halys diri ütdüler-le”...

“Rast aýdýaň,jora!” diýip,
Inçemik gyz myssa güldi.
Onýança-da arçyn Kempiň
Sygyr ýaly
Baýry aýaly
Myş-myş edip zomap geldi:

“Hany, sen gyz, pälwan bolsaň
Ýene-de bir orta çyk-la.
Gaýratyňy bir synaýyn,
Çawuşyňy ondaň çak-la!”

Diýip gyzyň goltugyndan
Geçirdi-de ellerini,
Haýbat bilen güjeňledi
Bilezikli gollaryny,
Şagyrdatdy saçlarynyň
Şir suratly pullaryny.

O heleýiň halta ýaly
Emjeklerne göwsün basyp,
Haram ýagly gapyrgasyn
Atagzy dek gowrup-gysyp,
Dulda ýatan daşsyz soka
Gütüledip basdy weli,
Bogsy çözlen ýanlyk ýaly
Zowlap çykdy ähli ýeli...

“Dyzawergin ýene!” diýip,
Güle-güle aram tapdym.
“Almytjygňy aldyň!” diýip,
Ilden soňam elim çarpdym.

El çarpanma bagry tütäp,
Süýşdi bärik
Golaý-golaý.
Gözlerinde oky bolsa
Boşatjakdy çisik heleý.
Öwsaýynyň bozukdygy
Iki uçly dagy däldi.
Ýassynara gaýdamda-da
Gözün çarhlah-çarhlap galdy.

Kerim Gurbannepesowyň "Taýmaz baba" poemasyndan bölek.

Kerim Gurbannepesowyň eserleriniň elektron kitap görnüşe geçmegini isleýäňizmi?

hawa-la, gaty gowy görýän şu şahyry(88%, 8 adam)

ýok, men bu adamy tanamok(11%, 1 adam)