Malyň ýagy zyýanlymyka?

Bir gezek bir üýşmeleňde biri Molla Töre Ahuna ýüzlenip:

- Ahun aga, indi pagtaň çigidindenem ýag alyp başlapdyrlar - diýip habar beripdir.

Töre Ahunam:

- Be-e, kesel köpeljek diýsene - diýip jogap beripdir.

Muny Ahun agaň özi diýipmi ýa diýdirýärlermi bilmedim, eger özi diýen bolsa, Ahun aga bir zatlary yşarat edendir diýen pikirim bar. O döwürlerde ösümlik ýagyndan köplenç künji ýagynyň ulananylandygy mälim. Eti iýilýän haýwanlaryň ýagy hem edil häzirki türkmenleriň ulanylyşy ýaly bolandyr diýip çak edýän. Goýnuň guýruk ýagy, düýedir köşegiň örküç ýagy, sygryň iç ýagy türkmen halkynyň milli tagamlarynyň aýrylmaz bir komponenti hökmünde biziň günlerimize gelip ýetipdir.

"Zaman" gazetiniň köneräk nomerleriniň birinde eti iýilýän haýwanlaryň ýagynyň ganyň düzüminde holesterini köpeldýändigi, ýüregiň işleýiş funksiýasyna zyýanlydygy barada, muny dünýäniň ösen medisinasynyň tassyk edendigi barada bir makalany okapdym. Ähtimal şoň üçin bolsa gerek, arap ýurtlarynda, Türkiýede we başga-da kän ýurtlarda adamlar ýagsyz et iýýärler. Hatda arap ýurtlarynda goýny soýup, derisini, guýrugyny, kelle-aýagyny, garyn-içegesini, iri süňklerini zibile zyňýarlar. 

Bizde welin, Ümür Esen aýtmyşlaýyn, goýun janaweriň yrýa zady ýok, ähli zady peýdalanylýar. Ýer ala, ýurt ala diýleni, kimiňkiň dogrudygyny bir Alla bilýär!