Kompot habarlar
Bir wagtlar «Kompot habarlar» diýen proýektim bardy.
Arhimiwi dörýäkäm gabat geldim.
Paýlaşmak isledim.
----
Bu kompot-habarlar dünýäniň habarlar bazaryndan iň tagamly we geň habarlardan toplanylyp ýasalýar. Gowy ýuwulýar, arassalanýar, täzeden türkmen dilinde işlenilýar we siziň öňüňizde goýulýar. Sowadyp içmegi maslahat berýarin. Gaby yzyna alynanok!
Allah bilen gatnaşykda bolmak ömrüňi uzaldýar
Köpbilim amerikan alymlary yzygiderli metjide gatnaýan adamyň özüniň saglygy üçin edil çilimini taşlan çilimkeşiňki ýaly peýda alýandygyny subut etdiler. Şeýle-de imanly (ynanýan) adamyň immuna sistemasynyň güýçlidigi, ynanmaýandan uzak we rahat ýaşaýanlygy, arterial gan basyşynyň sazlaşyklydygy, depressiýa diýen zadyň bolsa nämediginem bilmeýanliklerini subut etdiler.Emma, adam Allaha ynanmaýan bolsa näme etmeli diýen soraga alymlar sada jogap berýärler: -onuň üçin doga etmeli, dileg etmeli. San-Fransiskodaky hassahanada ýatan hassalary iki topara böldüler we hassalaryň bir topary üçin doga-dileg etdiler. Doga edenleriň arasynda hassalary düýbinden tanamaýan adamlar hem bardy. Netijede doga edilen hassalaryň topary doga edilmedik hassalardan 10% tapawutlylykda saglyklary gowlanmaga başlady. Oglanlar, biri birimize ýagşy dilegde bolalyň!
Norwegiýanyň asmanynda jaň sesi, azan sesi we ateistiň sesi
Norwegiýanyň paýtagty Osloda musulmalara hepde-de bir gezek anna günleri metjitden azan aýtmaga rugsat berildi. Emma Norwegiýanyň dinsizler jemgyýetiniň arzasyna seredilip, deňlik bolar ýaly olara-da hepde-de bir gezek mikrofon bilen "Hudaý ýok" diýmäge rugsat berildi. Indi Oslonyň asmanynda üç ses ýaňlanýar - hristianlaryň jaň sesleri, musulmanlaryň azan sesi we ateistleriň "Hudaý ýok" sesleri. makalanyň originaly bbcNorwegiýa musulmanlarynyň wep sahypasy (iňlisçe) Oslo Muslim Network
Ýaponiýada robot ofisiant restoranda işe başlady
Onuň ady MEÝMEÝ. Türkmençä geçirsek "Kiçijik uýajyk" bolýar, Kiçigyz diýsegem bolýar. Onuň edil türkmen gyzlarynyňky ýaly gyzyl reňkli KETENISI (KIMANOSY) bar. Ol myhmanlara hyzmat dýär. Eger öňünde päsgelçilik bolsa, onda ol aýlanyp geçiberýär. Emma her kimde bolşy ýaly adamlaryň elläp görmek endigi bolany üçin ony elläp göresleri gelýänler köp. Bir gezek - ýarym gezek ol (Meýmeý gyz) sesini çykarmasa-da çenden aşa geçýänleri gidip başlygyna aýdýar. Bu habary INTERFAX agentliginden eşitdik we türkmençeläp size ýetirdik.
Ol bogulyp ölýärdi, tomaşaçylar bolsa çapak çarpýardylar
Ýadyňyza düşse bizde geçen asyryň 80-nji ýyllarynda Gurban baýramlarynda gyzlar “gaçmak” çärelerini, jenaýatçylar bolsa gyzylly-çyzylly gyzlary talamak çärelerini gurnaýardylar. Bu baýramçylyklar köplenç ölüm-ýitimli gutarýardy. Dini baýramlar hristianlarda nähili bellenýär? Olaryň esasy baýramlarynyň biri - Pasha baýramydyr. Rimiň etegindäki bir kiçiräk şäherde hem hemme ýerde boluşy ýaly Isa pygamber bilen baglanyşykly teatrlaşdyrylan sahnalar görkezildi. Şeýle sahnada 23 ýaşly Renato di Paolo diýen artist Isa pygamberi satan öz okuwçylaryndan biri bolan Iudanyň roluny oýnanda sahnada ýalanjykdan etjek bolup hakykatjykdan özüni asdy. Artist daşyň üstünde durdy we boýnynda ýüp bardy. Ýupüň ujy bolsa agaja daňylgydy. Ol senariýa boýunça aýtmaly toba sözlerini aýtdy we boýnuna ýüp saldy. Tomaşaçylar çapak çaldy, emma, hiç kim onyň hakykatdan hem asylanyny duýmady. Has dogrudy duýdylar, emma biraz giç boldy. Ol eýýäm “Ezraýyl howaýollarynyň” reýsine münüpdi. Ony halas edip bilmediler. Ol özüne kast etdimi ýa-da başga zat boldumy buny bilmek polisiýa işgärlerine kyn düşer.
(dowamy aşakda)
Arhiwiň ýagdaýy
● Doly tekst
● 40/40 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 14 noýabr 2011 ý. · Asyl sahypany gör ↗
Teswirler 40
Hindistanda 4 ýaşly gyzjagazy ite durmuşa çykardylar
Sakawyň soňuna seret: Anýu atly 4 ýaşlyja gyzjagaz agyr keseller bilen keselläpdir. Hindistanyň bilgiçleriniň biri gyzyň kakasyna gyzyny ite durmuşa çykarmagy maslahat beripdir. Eger ol gyzyny ite durmuşa çykarsa, onda gyzjagazdaky ähli keseller, keselleri getirýän erbet ruhlar ite geçjekmiş we gyzjagaz sagaljakmyş. Hawa, bu waka Kalkutta şäheriniň eteginde bir kiçijek obada bolup geçdi. Toýa birnäçe “molla” (hindiçe näme bolýanyny bilemok) we 200-e golaý oba ilaty gatnaşdy. Bu barada “Reýters” habar berdi.
Gulagyň eşitmese gözleriň bilen eşit
Ýakynda Müsüriň paýtagty Kairdäki Saýid Zeýnab metjidinde juma namazlarynyň hütbesi eşitmek we geplemek nygmatyndan mahrumlar üçin lallar dilinde, ýagny el hereketleri bilen terjime edildi. Bu çäre Maýyplary goramak jemgyýeti tarapyndan teklip edildi we ullakan şowlulyk gazandy. Indi Kairiň iki metjidinde ymamyň aýdanlary surdo-terjime (lal diline terjime) ediler. Bu barada din işleri edarasy ýörüte karar çykardy. Lal dilinde hütbe - yslam taryhynynda uly täzelik. (Polit.ru)
gowy habarlar +
Garam, tapýaň-aý senem bir zatlar. molodes!!!
Hormatly @gara pişik! Sizi, (syn edişime görä) agyr mowzuklarda agyr teswirler bilen mertlerçe we örän ysgynyňy aýok ediji göreşlerden soň, köne taslamalaryňyzdan birini täzeden janlandyrmagyň üsti bilen, özüňizi hem-de bizi arkaýynlaşdyrmak, aň-pikirimizi gowşatmak we (belke-m) bilgilendirmek maksatly başlan bu tutanýerli işiňiz bilen tüýs ýürekden gutlaýaryn we üstünlik arzuw edýärin. Täze hyjuwlar arzuwy bilen..
Gürrüň mundan gelip çykdy!
chyndanam uytgeshik we gen habarlar. Bize yetireniniz ucin sagbolun.
bu kompot habarlarynyz yzygiderli bolarmyka? 🙂
Norwegiýanyň asmanynda jaň sesi, azan sesi we ateistiň sesi
Norwegiýanyň paýtagty Osloda musulmalara hepde-de bir gezek anna
günleri metjitden azan aýtmaga rugsat berildi. Emma Norwegiýanyň
dinsizler jemgyýetiniň arzasyna seredilip, deňlik bolar ýaly olara-da
hepde-de bir gezek mikrofon bilen Hudaý ýok diýmäge rugsat berildi.
Indi Oslonyň asmanynda üç ses ýaňlanýar - hristianlaryň jaň sesleri,
musulmanlaryň azan sesi we ateistleriň Hudaý ýok sesleri.
-------
«teswirler» bol-a.
Sokolat habarlar eken. 🙂 Okamak süýji boldy. Çaýjagaz bilen okaýsañ gowy bolýar. 🙂
gadym döwür 3-4 çüýşe ýapypdym, bu kompotlardan.
aslynda dowam etseňem boljak, hepde-de bir gezek.
pikirlendirdi.
tuweleme gowja tazelikler
SailorMoon, senin golundaky söz öñ bashga bir agzanyn golunda bardy. Bilyañmi? 🙂
dowamy gelse mena begenerdim. Bulary bilmek gaty gyzykly mana. 🙂
Gör, bak, haýsy uzaga giderkä?
Ýok, bilemokdym. Men ol sözi, pessemist bolanym üçin goýdum. Her bir zadyñ gowy tarapyny görjek bolýan. Ol sözler Garajaoglanyñ gosgusyndan. 🙂
hmm... Gowy usul ulanyan ekeniñ. Namede bolsa pesimistlikden cykmagyn ugrunda adim adipsiñ.
Shu wagt hem Batyr agzanyn golunda shu bent dur. 🙂
diymek bu setirleri halayan we ulanyan gaty kop adam bar.
ite durmuşa çykarylana gyzjagaza nebsim agyrdy
kompot habarlar d.p ýazylsa nameka oydup geng galdym😆 kompodynga ichdik sagja bol gara pi$ik😆
Meniň janymyň ýanýan ýeri, gyzyl ýaly pikiiňi bärde mugtuna satdyňda.
Sag boluň, bize ýetireniňiz üçin. Bu habarlar kime nähili täsir edýär biljek däl, emma käbirlerini entägem bilmeýän kän ekeni diýip hereketlendirmegi mümkin, belkäm käbirlerine gyzykly gelýändir, belkäm käbirlerine gynynçly geler. Her näme-de bolsa elekden geçmelimikä diýýän. Biziň däp-dessurymyzy we gymmatlyklarymyzy göz öňünde tutyp, rejeläp ýetirmelimikän diýýän. Dünýäde, sapyk düşünjeler sebäpli birnäçe bize geň gelýän habarlar bar emma biziň ruhy dünýämize erbet täsirindenem ägä bolmak gerek. Dünýäden habardar bolaly diýip bu deňze garşy ýelken açsak, soň yza dolanyp bilmän tolkuna garyşyp gitmäli..