Jorj Kleýson ALTYNJY MELHEM Girdeji mümkinçilikleriňizi köpeldiň

Altynjy güni Arkad:
— Okuwçylarym, bu gün size gapjygy galňatmagyň iň esasy serişdeleriniň biri hakda gürrüň berjek. Ýöne men altyn hakda däl-de, öňümdäki owadan lybasly oturan adamlar — siz hakda gürrüň etjek. Men siziň pikirlenişiňizde nämeler bolýandygyny hem-de üstünlik gazanmaga päsgel berýän zatlary düşündireýin – diýip, söze başlady.
— Ýakynda bir ýaş ýigit ýanyma gelip, karz sorady. Puluň nämä gerekdigini soranymda, ol güzeranyndan zeýrendi, gazanjynyň zerur harajadyna-da ýetmeýändigini aýtdy. Men gazanjy pes kişiniň karz alan puluny gaýtarmaga ýagdaýy bolmasa, pul berjek adamy tapmagyň kyn boljakdygyny aýtdym.
— Ýigit, saňa gazanjyňy köpeltmek gerek. Hany, aýt, köp pul gazanmak üçin näme edip gördüň?
— Elimden gelenini etdim. Soňky iki aýyň içinde aýlygymy köpelt diýip, hojaýynymyň ýanyna alty gezek dagy barandyryn, ýöne hiç peýdasy ýok. Zol-zol üstüne atalap durmagam gelşiksiz.
Oglanyň sadalygyna gülseň gülüp oturmaly. Ýöne onda girdejini köpeltmegiň iň wajyp şerti — köp gazanmak islegi bar. Bu juda gymmatly hem öwgä mynasyp isleg.
Güýçli hem kesgitli isleg deslapky şert bolmaly. Kesgitlenmedik isleg gury hyýaldyr. Gury arzuw-hyýalyň baýajak bolýan adama peýdasy ýok. Eger bir adam bäş altyn pul gazanasy gelýän bolsa, muny gazanyp bolýar. Ol adam bäş altyn gazansa, edil şeýle usulda on, ýigrimi, müň altynam gazanyp biler. Ahyr bir gün tüçjar baýam bolar. Kiçi arzuwlara ýetmek, seni has uly arzuwlara taýýarlaýar. Baýlyk şeýdip ýygnalýar. Ilki ownuk pullardan jemlenip başlasa-da, soň adamyň bilimine, tejribesine görä has uly hasap bilen artýar.
Isleg düşnükli hem kesgitli bolmaly. Eger olar köp bolsa, düşnüksiz bolsa, adamyň mümkinçiliklerinden uzakda bolsa güýjüni ýitirýär.
Adam öz hünärini, işini kämilleşdirdigiçe, onuň girdejisi-de artýar. Ýaş oglankam mürze bolup, bilimizi ýaý ýaly egreldip, her günde iki mis pul üçin şykgy ýazgylaryň üstünde ýegşerilip işleýärkäk köp zähmet çekýänleriň köp gazanýandygyny bilýärdim. Men hemmelerden öňe saýlanasym gelipdi. Olaryň nädip köp gazanýandygyna düşünmek üçin köp wagt gerek bolmady. Işiňe höwesli, gyzyklanyp ýapyşmaly, edýän işiňe köp üns bermeli, ýadaman, arman-irmän işlemeli — ine, köp gazanýan mürzeleriň menden parhly taraplary. Meniň yhlasym bimyrat bolmady, hojaýynymyň ýanyna aýlygymy köpeldäý diýip, alty gezek barmaly-da bolmadym.
Biz näçe köp zat bilsek, şonça köp gazanyp bilýäris. Öz işini öwrenýän, kämilleşdirýän adam hökman üstünlik gazanar. Eger ol suratkeş bolsa, has zehinli halypalaryň işleýiş usullaryny, tilsimlerini öwrenmeli. Eger ol kanun bilen iş salyşýan bolsa ýa-da lukman bolsa bu hünärlerden başy çykýan ussatlaryň maslahatyna eýermeli. Eger ol söwdagär bolsa hemişe iň gowy hem iň arzan harytlary gözlemeli.
Başga adamlaryň kömek-ýardamyna mätäç bolup oturandan, öz ukyp-başarnygyňyzy ulanyp, edýän işiňizi kämilleşdiriň. Şonuň üçin men siziň hemmäňizi, bir duran ýeriňizde durman, hemişe kämillige tarap ymtylmaga çagyrýaryn, ýogsa sizden ozup geçerler.
Ynsan durmuşyny köp zatlar gymmatly tejribe bilen baýlaşdyrýar. Eger adam özüne hormat goýýan bolsa, şu zatlara ýykgyn etmeli:
Ol bergilerini, mümkin boldugyça, möhletinde üzmeli, hasaplaşyp biljek möçberinden köp pul karz almaly däl.
Ol maşgala agzalarynyň, öýündäkileriň özi hakda gowy pikirde bolmaklary üçin, hojalygy barada alada etmeli.
Ol haçan-da bir zaman dünýesini täzelemeli bolaýan halatynda hemme zatlaryň adalatly paýlanmagy üçin, wesýetnama düzüp goýmaly.
Ol şowsuzlyga uçrana duýgudaşlyk bildirip, mümkinçiligine görä hemaýat bermeli. Ol öz ýakynlaryny goldamaly.
Ine, igli gapjyk üçin ýedinji hem soňky melhemem şu: güýç-gurbatyňy artdyr, paýhasyňy, başarnygyňy kämilleşdirmek üçin oka, öwren, özüňe hormatly hereket et. Şeýtseň öz-özüňe ynamyň artar, oýlanyşykly eden gowy arzuwlaryňa ýetersiň.
Igli gapjyk üçin ömrümde akyl ýetiren, rysgal-bereket tapan ýedi melhemem şulardan ybarat. Bulary baýasy gelýän adamlaryň ählisine-de maslahat berýärin.
Okuwçylarym, Wawilonyň altyny siziň pikir edip biljek çakyňyzdan has köp. Ol şeýle bol, hemme kişä-de ýeter.
Baryň, şu hakykatlary peýdalanyp, bolçulyga, baýlyga ýetiň.
Baryň, patyşanyň paýhasyndan hem şäheriň rysgalyndan paý almaga my

(Dowamy bar)
Terjime eden: Arslan Alaýew.

Biznes we motiwasiýa