Owadan

Baýdak ýaly ýaşyl öwsüp gelende,
Ülkämiň bahary – ýazy owadan.
Göwünleri galkyndyryp belende,
Ýaňlanýan aýdymy-sazy owadan.

Gorkmasyn, goý, degre-daşyn garanyp,
Garagumda gezýän akja jerenim,
Durnagöz kölüme düşüp, daranyp,
Oýnaýan ördegi, gazy owadan.

Säher ýaly gojalarynyň başlary,
Säher ýaly ejeleriniň başlary,
Ýakalary alabahar keşdeli,
Al-ýaşyl geçiren gyzy owadan.

Gökden baksaň, mele çölüm Gün ýaly,
Garly Köpetdagym akja gül ýaly,
Ýagşylyga alyp barýar dünýäni,
Meniň gül Watanmyň özi owadan.

Awtory: T. Ýaýlanow