Bahar buşlukçysy

Pasyllaryň soltany bahar pasly hem ýetip geldi. Tebigata jan girip, daş-töweregiň ýaşyl dona bürenmegi her bir ynsana ruhy lezzet berýär, göwnüňi göterýär. Şahyr Halyl Kulyýewiň:

Gaýalaryň gary eräp bireýýäm,
Pyntyklady pisse bilen badamlar,
Bahar ýeli aýnalary kakyp ýör:
Bahar gelýär, bahar gelýär adamlar

diýen setirleri biygtyýar ýadyňa düşýär. Gözbaşyny gadymyýetden alyp gaýdýan “Nowruz baýramy” “Täze gün” diýmegi aňladýar. Bu baýramyň dünýäniň köp döwletlerinde bellenilmegi milletleriň arasyndaky dost-doganlygyň berkemegine, milli mirasymyzy has-da dünýä tanatmaga uly itergi berýär.

Ene-mamalarymyz Nowruz baýramynda “Semene” milli tagamyny bişirip goňşy-golamlaryna paýlapdyrlar. Bu däp-dessur gadymyýetden häzirki günlere çenli gelip ýetipdir. Aýratyn bellemeli zat hem söýgüli şahyrymyz Gurbannazar Ezizow baharyň ilkinji güni doglandyr.

Türkmen sährasy – Gurbannazar Ezizow
Bahar meýlisinde çyksaň seýrana,
Türkmen sährasynyň aldyr gülleri.
Başyň sypap seni goýar haýrana.
Belent daglaryndan öwsen ýelleri.

Gara bulut gelip, zemine çöker.
Al-asman gübürdäp, depregin kakar,
Daglardan sil akar, ýene gün çykar,
Gyz-gelin doldurar reýhan çölleri.

Ýagyşy ýaraşar ýaýlaň ýazyna,
Gerçekler bendidir aşyk gyzyna.
Sesin goşup dutar, gyjak sazyna,
Saýrar illerimiň şirin dilleri.