Indiki

Mydama nämädir garaşyp ýörşüm –
Bu nähili ahwal,
Bu nähili zat?
Aýeroportda
Meniň ünsümi çekýär
Gonan däl-de –
Indi gonjak samolýot.

Günler hatar-hatar geçişip barýar.
A men nazarymy aýlap daşlara,
Gözetimde gonan guşlara däl-de,
Garaşýan indiki gonjak guşlara.

Meniň soňky ýazan bentlerimi
Ýoldaşlarym öwüp,
Ýürege düşdi.
Ýöne nämüçindir meniň göwnüme,
Gowy boljak ýaly –
Indiki goşgy.

Bu gelen säheri synlap durşuma
Indiki sähere uçýar hyýalym.
Munda däl, indiki köçede belki
Duşar maňa –
Gözläp ýören aýalym.

Dostlarymyz gidip barýar gelmeze,
Galanlaram garaşyp dur nobata.
Kim bilýär, - doganlar indiki gezek
Münmeli men bolsam nätjek
Tabyda?

Ýasyň gutardygy däldigin bilýän
Bir dostumy ýere gömenim bilen.
Her niçikdir elden bermän umydy
Ýaşap ýörün –
Ertä ynamym bilen.

Ynanýaryn –
Özümizden kiçileň
Bizden has päkize boljakdygyna.
Ynanýaryn –
Agşam düşse daň atyp,
Indiki
Säheriň geljekdigine.

Şoňa ynanmasak, dostlarym, bize
Ýaşamak nähili bolardy güzap.
Arzuw-umyt bilen ädim ädiber,
Indikä göz dikip,
Hem öňe dyzap.

Resul Gamzat