Seniň bagtly bolmagyň

Bu gün ýene obamyza gelipsiň,
Bir üýtgän zat: aradaky menziller
Hemem başyňdaky al-gyzyl öýmäň,
Eliňde özüňe meňzeş çagajyk..
Özgerse-de ykbal, durmuşyň, durkuň,
Meň gözümde ozalkyja gyz görküň...

Salgyma dönýänçä jadyly keşbi,
Bir agyz söz diýmän, seredip galdym.
Aý, hawa, peýdasy näme gepläniň?!
Diňe ýüregimi eredip galdym...
Ýogsa öňküler deý söýýän şu wagtam,
Ýöne bize aýyp bolar mundan soň.
Goý, özüm çekeýin hijran yzasyn,
Belki, yş görüner gara tümden soň...

Bar arzuwym, seniň bagtly bolmagyň
Gözüňe ýetmesin gyňajyň ujy
Özüň deý, owadan bolsun ykbalyň.
Özgerse-de ykbal, durmuşyň, durkuň,
Meň gözümde ozalkyja gyz görküň...

Annagurban Annagurbanow