Hiç zat gürleme

Maňa söýgi hakda hiç zat gürleme,
Çydardan juda kyn söýginiň derdi.
Ol ejiziň asla golundan gelmez,
Yşk... müzzerder eken "men" diýen merdi.

Maňa söýgi hakda hiç zat gürleme,
Agtarmaly toslamalaň gatyny,
Geçmiş depderçesin reňklere boýan,
Ýatlamak islämok, söýgi hatyny.

Hatda, ne hakykat ne-de bir çäk bar,
Owadan sözleri tutup ýalana,
Diňe bir meni däl, aldap özüni,
Nälet bolsun, şeýle haty ýazana.

Hiç zat gürleme sen, söýgi hakynda,
Gürleme sen ýüregimi dagladyp,
Eý biwepa muňa neneň dözýärsiň?!
Bigünä ynsany ýeke agladyp?!

Söýgi päk hem bolsa, sarpasyn tutman,
Söýgiň adyn garalaýandyr ynsan,
Goý durmuşdan çyksyn ýalan söýgüler,
Ynsanlara özüň berewör ynsap.

Meredow Gurbanmämmet