Açda algym ýok meniň

Meñ ýanymda ölüm hakda dil ýarma!

Goý, hol derek kesmesin öz şelpesin.

Oñarsañ, gaýgyly habar getirme,

Indi berin eşitmäýin ýas sesin.

Adam herne giç düşünýär bir zada,

Sag günüñ bagt çuñdur, gaýgyñ ýüzleý señ.

Çekmez ýaly hasrat ýokdur dünýäde

Iller aman bolsa, başlaram – esen.

Pitiwa etmeýen, bitindi göwün,

Meñ üçin oýundy pelegiñ şumy.

Ah, bir günem, bir gün, bir betbagt gün

Uçurdym elimden şuñkar guşumy.

Meýlisim sowuldy, galdym men gamda,

Günler soldy paçagy dek gülabyñ.

Giñ dünýäñ gyzygy gaçdy bir demde,

Gülsem, gülküm ýalan, aglasam – agym.

Gursakda gam-gussa goş basdy uzak,

Ýüregim gan öýdi – tenim ýarasyz.

Bu hasrat – ömrüme gurlan bir duzak,

Tüm içre galdym men elim çyrasyz.

Şoñ üçinem misli sansyz kümüş tar,

Derek bes etmesin şelpe kakmasyn.

Bäş günlük dünýäde gussa ne derkar?

Biwagt çak agy sesi çykmasyn.

Ah, ýöne çekmäge niçik güýç ýeter?

Gördüm men pelegiñ agyr şumuny.

Ýüregimde oñ ýerini kim tutar,

Uçurdym elimden şuñkar guşumny…

*     *    
Mañlaýda ne bolsa, baryn görmäge,

Geldim bu ýalançy, ýagty jahana.

Bu dünýä bäş günlük ömür sürmäge,

Hem özümi tanamaga bahana.

Söýdüm men kirpigi ok dek gyzlary,

Kyrk aşygy ýakan her bir ädimde.

Ol gyzlañ wepaly gara gözleri,

Näzik dodaklary galdy ýadymda.

Bu gün özge derde uçrady başym,

Otuz iki ýaşy arka atamda.

Il-günüñ, topragyñ gaýgysy işim,

Men wepa gözledim ata Watandan.

Höwesim – at münsem düzi gulaçlap,

Ötmese deñimden biparh görk meniñ.

Murgap derýañ läbik suwundan başlap,

Boýlap çyksam, çeşme-çaýyn türkmeniñ!

Ýetim gözýaş dökse, gulagmy tutsam,

Derdine em etsem döwlen agajyñ,

Bet niýetliñ özün oýnunda utsam,

Bil tutuşsa, tapsam onuñ alajyn.

Öz elinde bolsa halkymyñ erki,

Çagalam gürlese ene dilimde,

Başyndan inmese il üçin gorky,

Är ýigde gorky ýok şahsy ölümde.

Öz başymy il öñünde egmäge,

Kişi başyn egdirmäge gelmedim.

Men bu dünýä il göwnüne degmäge,

Ýa göwnüme degdirmäge gelmedim!

Bu bir gedemlik däl

Ýa ”men-menlik” däl,

Parhlydyr her kesiñ ömrüniñ baby.

Men – bu dünýä berlen anyk bir sowal,

Hem özüm oñ – ýalñyz dogry jogaby

    *     *
Şükür, alhamdililla,

Ilden aýry görgüm ýok!

Açda algym ýok meniñ,

Şükür, bege bergim ýok!

Kimsäni örtemedi?

Durmuş bir gara gazan.

Ilden artyk ýanmadym,

Ýanmadym ilden azam.

Çeksem-de men ezýeti,

Ýalbarmadym namarda.

Şygrym derde ýarasa,

Ömrüm ýarar meñ derde.

Galagoply bu zaman

Şeýle ýürege ýakyn.

Çünki göreşip ölmän,

Diriligñi bilmek kyn.

Töhmet ölümden ajy.

Duşup, şeýle çakladym:

Ajydan ajysy bar,

Beterinden saklasyn!

Bu bir köne dünýedir,

Örtär, gözde ýaş eder.

Akmak sürer döwrany,

Akyl herne iş eder.

Birmeñzeşlik irizýär.

Ýetse-de ol bir pellä,

Birmeñzeş günleñ üçin

Şükürim kändir, Alla!

Şükür, alhamdililla,

Ilden aýry görgüm ýok.

Açda algym ýok meniñ!

Şükür, bege bergim ýok!