Aýyň saçlaryny sypady elim

Ýene seni ýada salyp erikler
Başa gülli ýaglygyny orandy.
Bilmen senden öwrenipmi, görüpmi,
Elin suwa sokup otyr toraňňy.

Baglar gijelige syçradyp ýagty
Ýaşyl tütün bolanynda heserden.
Erik güllänini dünýäniň bagty
Hemem öz myradyň saýar gezer gezerdiň.

Wysal bilen gitdiň
Dälibaş dünýe
Ýaşyl gaýnawynda gaýnap duranda,
"Bagtly bol" diýýän dek ýylgyryp tümler
Ýaplar dile gelip, saýrap duranda.

Adamyň birgeňsi häsiýeti bar,
Ýazyksyz bir zada öwrülip käte,
Mähri siňen adamlary ýatlaýar
Birçak gören düýşi düşýän deý ýada.

Bu baharda ýene seni ýatlaýan
Güllän agaç deýin, günäsiz gül deý.
Gije sansyz şemlerini otlaýar
Gündizi geýinýär bu dogduk ülke.

Seniň bagtlydygňa ynanjym hakdyr,
Ony siller almaz, ýyldyrym urmaz.
Men bu gün yşk edip, bahara bakdym,
Başymy sypady, "Boýnuňy burma!"

Ine, onsoň şuny ýüregim syzdy -
Sen bagtly bolmanam bilermiň, heý-de!
Ýogsa, bu toraňňy aýdym aýtmazdy,
Ýogsa, bu erikler çogmazdy beýle.

*     *     *

Sallançakdan düşüp, meýdana gitdim,
Güllere çolaşyp ýykyldym ýere.
Güýzüň dumanynyň içinde ýitdim,
Ýazda bogun-bogun söküldim ýele.

Ýüzüme ýetişen Aýyň şuglasy,
Kalbyma şatlygyň ýagtysy düşdi.
Ak gijede tanyş ýeller şuwlady,
Gül çogan meýdanlar bagtyma düşdi.

Güneşiň astynda gül bilen galňan
Gözýetim gözüme nur berdi meniň.
Bir bahar gijesi köşeşip bilmän,
Aýyň saçlaryny sypady elim.

Öwrenşen ýazymyň gözden uçanna
Ýüregim bilniksiz gyýyldy durdy.
Gyşlar gelip ak ýüzüni açanda
Bilmedim, bir syrym duýuldy durdy.

Belki, ýaşlygmyzyň görki şundadyr,
Utandym men, syr sakladym özgeden.
Kiçijik şatlyga goýuldy gadyr,
Hem ulaldym syrlaryma dözmeden.

Çolaşan güllermi ýatlaýan käte,
Gözümiň alnynda Aýlar ýetişýär.
Ýöne gamly günüm, şat günüm ýada
Garyp enem bilen sallançak düşýär.

Awtory Mämmetnazar Babanazarow.

Goşgulara düşündiňizmi?

Hawa(83%, 5 adam)

Ýok(0%, 0 adam)

Goşgy okamok. Bu mowzugam ýalňyşyp açypdyryn(16%, 1 adam)