Internetde nähili pul gazanýarlar?

Internetde pul gazanýanlar nähili gazanýarlar. Esasy üç usuly bar.

Birinjisi, internetiň daşynda edilýän işi internetiň içine getirip pul gazanýanlar. Meselem, eger bir dükan bar bolsa, onuň söwdasyny internet arkaly amala-aşyrmak söwdanyň gerimini has-da giňeldýär, girdejini artdyrýar. Muňa mysal hökmünde ABŞ-da işleýän «WalMart» kompaniýasynyň onlaýn dükanlaryny görkezmek bolar. Bu kompaniýanyň söwdasy internet ýok wagty hem ýöreýärdi, emma internet aragatnaşygy bilen söwda etmek, harytlara göz gezdirmek, olary öýe sargamak, olary halanmasa yzyna tabşyrmak has aňsatlaşdy. Bu ýerde esasy bellemeli zat, internetiň edil özünden pul gazanylmaýar. Internet diňe bir aragatnaşyk serişdesi bolup hyzmat edýär. Maglumatlaryň elýeterliligini artdyrmak bilen, söwda has ösýär. Esasy girdejiniň özeni ýene-de harytlaryň satuwyndan döreýär. Ýene bir mysal hökmünde, onlaýn kurslary görkezmek mümkin. Mysal üçin, bir uniwersitetiň adaty gatnalyp okalýan sapaklary bar bolsa, bu uniwersitetiň ýolbaşçylary pikirlenip, şol okuw materiallaryny gaýybana okajak adamlar üçin ýörite sapaklar arkaly berip bilerler. Ýagny leksiýalar, öý ýumuşlary we beýleki okuw materiallary internet arkaly ýörite sapaklar görnüşinde berilýär. Talyplar bolsa, okuw jaýyna gitmän, öýlerinde oturan ýerlerinden şol sapaklary okap bilýärler we diňe synag mahaly okuwa baryp tabşyryp bilýärler. Bu okuw hyzmatlary üçin pul tölegi alynsa onlaýn kurslar girdejili bolup bilýär.

Amaly maslahat №1: Ýagny birinji toparda pul gazanýanlar öz harytlaryny we hyzmatlaryny internet saýtlary arkaly giň köpçülige elýeterli edýärler we söwda dolanşyklaryny giňeldýärler. Eger siziň hem öz dükanyňyz ýa-da başga bir işiňiz bar bolsa, onuň hyzmatlaryny internete çykarmak arkaly söwdaňyzy ulaldyp bilersiňiz. Muny etmek kyn däl. Internetde mugt web saýtlary açmak mümkinçilikleri örän kän. Olaryň içinde websaýty awtomatiki düzmek üçin ýörite programmalar hem ýerleşdirilendir. Ýagny kompýuter sowatlylygyňyz bar bolsa, onda programmist bolmasaňyz hem özüňize saýt açyp bilersiňiz. Mysal üçin https://sites.google.com/ saýtyndan başlap bilersiňiz. Eger siziň restoranyňyz bar bolsa, ady goý Aşgabat restorany bolsun, onda siz özüňize https://sites.google.com/site/ashgabatrestoran diyip açyp bilersiňiz. Ol ýerde restoranyňyzda taýýarlanýan naharlaryň we içgileriň menýularyny goýup, adamlaryň restoranyňyz bilan has ýakyndan tanyşmagyny gazanyp bilersiňiz. Ol ýerde bahalary çap etseňiz her kim öz jübisine görä siziň restoranyňyza gelip-gelmejekdigini kesgitläp biler. Restoranyňyzyň reklamasyny saýtyňyzda ýerleşdirip üns çekiji, toý we doglan gün hyzmatlary ýaly ýörite çäreleri hem bildirmek mümkin. Iň esasysy bolsa saýtda telefon belgileriňizi we e-poçta adresiňizi goýmagy unutmaň. Sebäbi myhmanlar jaň edip sorap bilerler. Bu hyzmatlaryň üstüne tagamlaryň öýe eltip berilmegi ýaly hyzmatlary goşsaňyz internet saýtyny açandygyňyza ökünmersiňiz. Edil şu restoran ýaly, beýleki hyzmatlaryňyzy hem internete çykaryp bilersiňiz. Dükan bolsun, remont bolsun we beýleki işler. Eger özüňize aýratyn saýt açmak isleseňiz onda www.ashgabatrestorany.com diýen yaly domen adyny satyn almaly we saýtyň ýerleşdirilmegi üçin «hosting» hyzmatyny satyn almaly bolarsyňyz. Domen ady ýyllyk 10 ABŞ dollaryna, hosting bolsa ortaça 30-100 ABŞ dollaryna düşer. Ýöne ilki mugt saýt açyp, onsoň ýagdaýa görä ýuwaş-ýuwaşdan pul tölenýän öz hususy websaýtyňyza geçip bilersiňiz. Soň öz saýtyňyz açanyňyzda köne saýtyň içinden oňa gider ýaly etseňiz bolýar.

Ikinjisi, pul gazanmak üçin interneti ulanmagyň ýene bir usuly reklamalardyr. Internetde görýän reklamalaryňyzyň girdeji gazanmagynyň iki görnüşi bardyr. Ýagny her basylyş üçin töleg we her görkeziliş üçin töleg. Ýagny bir reklamanyň üstüne basylandygy üçin meselem 0,005 Amerikan dollary tölenýär. Reklamanyň her görkezilişi üçin bolsa 0,0005 Amerikan dollary tölenýär. Ýagny 1 dollar gazanmak üçin siziň saýtyňyza giren adamlar 200 gezek reklamanyň üstüne basmaly bolýar. Görşümiz ýaly 1 dollary gazanmak aňsat däl. Adamlar hiç haçan «nirede reklama barka, basar ýaly?» diýip höwes etmeýärler. Tersine olar başarsa reklamadan gaça durýarlar. Eger-de saýtda görkezilen reklama olaryň ünsüni çekmese, olar hiç haçan reklama basmaýarlar. Mysal üçin, aýdym-saz baradaky saýtda däri-dermanlara degişli reklama çyksa örän biri-biri bilen baglanşyksyz ýagdaý ýüze çykýar. Aýdym-saz nire, kelleagyry derman nire?

Olar «bu basmasa, indiki basar, o basmasa onda soňky basar» diýen umyt boýunça işleýärler. Şonuň üçin olar saýtlarynda müňlerçe, hat-da millionlarça adamlaryň ünsüni çekäýjek hyzmatlary berýärler. Mysal üçin mugt blog hyzmatlary, «Youtube» ýaly mugt wideo görmek we neşir etmek mümkinçiliklerini goýýarlar. Gazet-žurnallar we beýleki döwürleýin neşirler edil kagyzda reklamadan pul gazanyşlary ýaly, internet saýtlarynda hem reklama goýmak bilen girdeji gazanýarlar. Her kim habar okasy gelip, günde bu saýtlara girýändigi üçin olaryň myhmanlary köp bolýar. Amaly maslahat №2: Aslynda reklamadan pul gazanmak teoriýada kyn däl. Özüňize mugt internet saýt açyň. Onda adamlaryň üçin gyzykly we peýdaly maglumatlary neşir ediň. Mysal üçin, saglyk we sport barada. Google AdSense hyzmatynda özüňize hasap açyp, reklamany saýtyňyzyň görnükli bir ýerine ýerleşdiriň. Saýtyňyza näçe köp adam gelip, näçe köp reklama basylsa size birneme girdeji geler. Ýöne ýokarda belläp geçişimiz ýaly, ummasyz baýlyga garaşmaň. Esasan-da saýtyňyz türkmen dilinde bolsa türkmen diline düşünýän adamlaryň sany az bolanlygy üçin myhmanyňyz az bolmagy mümkin. Şonuň üçin saýtyňyzy açanyňyzda haýsy dilde neşir etjekdigiňizi hem öňünden oňatja pikirlenmeli.Şeýle-de, saýtyňyzy ýygy-ýygydan täzeläp durmasaňyz adamlaryň kän gelmejekdigini hem bellemek gerek. Eger aýdym-saz we wideo ýaly adamlary has gyzyklandyrýan özüne maýyl edýän saýtlary açsaňyz onda girdejiňiz has köpräk bolar. Eger ýönekeý ýazgylar we seýrek täzelenýän makalalar goýsaňyz onda saýtyňyza köp adam çekip bilmersiňiz. Köp gazanmak üçin, köp pikirlenmeli we köp azap etmelisiňiz. Üçünjisi, siz edara hem däl, dükan hem däl diňe bir şahs bolsaňyz emma eliňizde aýratyn bir hünär bolsa, onda şol hünäri ulanyp internetde pul gazanyp bilersiňiz. Mysal üçin siz terjimeçi bolsaňyz internetden terjimeçilik saýtlaryny tapyp terjime edip pul gazanyp bilersiňiz. Edil şonuň ýaly, internetde programmistler hem dizaýnerler özleriniň hünärlerini ulanyp girdeji gazanyp bilýärler. Şeýle ýagdaýda işi berýän bilen işi ýerine ýetirýäniň arasyndaky aragatnaşyk möhümdir. Bu ýerde üns bermeli zat, edilýän işiň anyk we gutarnykly bolmagydyr. Töleg meseleleriniň hem iş başlamanka, anyklanmagy zerurdyr. Ýagny pulyň haýsy usul bilen işi ýerine ýetirene beriljekdigi düşnükli bolmalydyr. Bu ýerde köp kişi ilkibaşda özlerini reklama etmek üçin arzan işleýärler. Soňra işleri wagtynda ýerine ýetirýän we ýokary hilli taslamalary amala aşyryp bilýän programmistler hökmünde abraý toplansoňlar, özleriniň edýän azaplarynyň bahasyny ýuwaşjadan artdyrmaga başlaýarlar. Bu hakyky durmuşda hem şeýle bolýar dälmi eýsem? Bu saýtlarda uly taslamalary 5-6 ýa-da 10-20 programmist bolup bile ýerine ýetirýänlere hem duş gelmek bolýar. Sebäbi bu taslamalar çylşyrymly bolýar we bir adamyň hötdesinden gelip biljek işi däl. Iş berýänler hem internetiň üsti bilen çykdajylary azaltjak bolýarlar. Mysal üçin Hytaýdaky ýada Hindistandaky programmistler Gollandiýadaky programmistlerçe bilseler hem az töleg almana razy bolmaklary mümkin. Amaly maslahat №3: Eger terjimeçi bolsaňyz http://www.translatorscafe.com/ , programmist bolsaňyz www.freelance.com saýtlaryna seredip bilersiňiz. Bu saýtlarda özüňize hasap açyp, ol ýerde berilýän bildirişlerde edip biljek işleriňiz bar bolsa, şolara ýüz tutuň. Mysal üçin programmist bolsaňyz, şol ýerde berilýän bildirişi ünsli okap, iş barada, onuň gutarylmaly wagty barada maglumatlary bilip öz mümkinçilikleriňize görä netijä geliň. Saýtda pul meselesiniň hem nähili çözülýändigini, iş berýän bilen işi ýerine ýetirýäniň arasyndaky düşünişmezlikleriň nähili çözülýändigi barada hem maglumat ediniň. Eger ol ýerde edilýän işleri ýerine ýetirip bilmejek bolsaňyz, haýsy ugurdan höwesli bolsaňyz şol ugurdan özüňizi kämilleşdiriň we soňra täzeden şol saýta göz aýlaň. Öz ýerine ýetiren işleriňizi indiki müşderilere görkezer ýaly düşnükli we görnükli edip saklaň. Öňki eden işleriňize hormat goýuň we özüňizi elmydama kämilleşdiriň. Interneti ulanmak üçin iňlis dili köp gerek bolýar, şonuň üçin ony bilmeýän bolsaňyz, öwrenmäge başlamak üçin häzirden gowy wagt ýok. Şu maslahatlar size peýdaly bolandyr diýip umyt edýärin. Işiňiz şowly bolsun, gadyrly okyjylar!