Saňa duşuşyklar garaşýar

Ogluma

Senem saklap ýatybilmersiň ahyr
Bu eşretli bigam öýüň duluny.
Çykar-da gidersiň haklamak üçin
Beýniň bekeýänçä iýen duzuňy.

Diýerler: "Han ogul, gyssanma entek,
Eneň-ataň saýlap-seçip, öýersin".
Ýol uzakdyr, ýaşap ýörseň sag-aman
Sen bizsizem ýigrenersiň, söýersiň.

Goramaga ýetmese-de erkimiz,
Oýanyp daňdan ýa gijäň ýarynda,
Diýeris biz içimizi gepledip:
"Oňat bordy bolan bolsak ýanyňda".

Ýap-ýaňam çagadyň, ondan bäri kän
Günler, aýlar geçen eken aýlanyp.
Gidiber. Başyň ýaş. Garaşýar indi
Saňa duşuşyklar, bize aýralyk.

Hoşlaşaly, geýip galňas penjegiň
Biliň guşa, ilikleriň ötür-de.
Soň gidiber önüp-ösen ojagyň
Başynda az salym dymyp otur-da.

Körpe guzy

Urşuň yz ýanydy, başlapdy bolap
Toşap ýaly çakyr bilen gara nan.
Bir sazandaň körpe ogly galypdy
Ekiş döwri aşagynda boranaň.

Şondan soň sazanda çykmady ile,
Oglunyň kyrkyny eňräp geçirdi.
Ahyr göwnün açmak üçin bir dosty
Gidip ony öz öýüne getirdi.

Işikdäki alma otyrdy gülläp,
Bugaryp durdy oň astynda gazan.
Iýilip-içilip gyzansoň meýlis
Tapyldy dutaram, çalyndy sazam.

Alyp gelipdiler dutary bilen
Oturşyga bir nätanyş uzynam.
Diýdi ol oklap bir sary ýüzlügi:
"Çalyp goýbersene "Körpe guzynam"!

Alyp biri orta oklanan puly
Eýesiniň öz öňüne taşlapdy.
"Körpe guzy goçgaryňdan aýryldyň"
Diýip, gazma dutar saýrap başlapdy.

Ýadymda meň o saz,
Naharçy gojaň
Eli bile ýüzün tutup turşy-da.
Ýadymda sazandaň hor ýaňagyndan
Şor damjalaň seçelenip durşy-da.

Awtory Atajan Annaberdiýew.