Kalbyñyz rahat bolsun!

Haýsydyr bir sebäbe görä dörän ýakymsyz duýgulary: howsalany, gahary, ýigrenji, öýke-kinäni ýeñip, rahat ýaşamak isleseñiz, psihologyñ 11 maslahatyny berjaý ediñ!

1.Howsalanyñ “ojagy” nirede?
Kämahal kalby düşnüksiz, göräýmäge hiç bir sebäpsiz howsala gurşap alýar. Ýürege bir zat sanjylýan ýaly bolup durýar. Şeýle ýagdaý 1 gün däl, 2 gün däl, hepdeläp, käte aýlap, hatda ýyllap hem dowam edýär.
Ruhy agyrydan dynjak bolsañ, hökman howsalanyñ “çeşmesini” aradan aýyrmaly. Käte… telewizory öçürmek ýeterlik bolýar. Teletomaşanyñ köpler üçin gyzykly güýmenjedigine söz ýok. Ýöne telewizion gepleşiklere, filmlere yzygiderli seretmek howsalaçyl, hemişe ünjüli, ýüregi “bükdülgili” adamlar üçin howply. Bu- hünärmenleriñ pikiri. Olar iñ gowusy penjireden seredip, daşaryny synlamagy ýa-da radio diñlemegi maslahat berýärler. Otagda deñziñ, daglaryñ, sähranyñ, gülleriñ suratlaryny asmaly. Sebäbi tebigatyñ şekilleri köşeşdirýär, rahatlandyrýar.

2.Aşa köp howsalaçyllyk-ruhy keseliñ alamaty
Bu derde ýoluganlaryñ gözleýäni-köçe-ýol hadysasy baradaky myş-myşlar, seredýäni-gandöküşikli filmler, okaýany-jenaýatçylyklar hakyndaky habarlar. Sonar gören-eşidenini başgalara gürrüñ bermekden lezzet alýarlar.
Özüñiz şeýle kesele uçran bolsañyz, psihologa ýa psihiatra ýüz tutuñ.

3.Dermanlyk ösümlikler kömek eder
Hünärmenler howsala düşmek kesele öwrülende, hökman newrotola ýüz tutmagy, bejeriş almasañ hem iñ bolmanda derman ösümlikleri ulanmagy maslahat berýärler. Sarygülüñ (zveroboy, jerebay) petiniñ howsalaçyllyk bilen baglanyşykly nerw bozulmalarynda kömek edýänligine dine bir biziñ ýurdumyzyñ däl, eýsem, beýleki döwletleriñ hem lukmanlary oz tejribesinde göz ýetirdiler.

4.Şowsuzlyk täleýe ýazylmaýar
Käbir adamda döreýän howsalaçyllyk, ýakymsyzlyklara garaşmak endigi “galp gymmatlyklar ulgamy”, durmuşa ýokarlandyrylan talaplaryñ bildirilmegi bilen baglanyşykly. Hakyky mümkinçiliklerden çapraz düşýän islegleriñ adatça puç bolýandygy belli. Özüñi şeýle ýagdaýda goýýan adamlar mydama şowsuzlyga uçraýarlar. Olarda “şowsuzlyk täleýine ýazylan ýaly” duýgy döreýär. Öñde hakyky mümkinçiliklere laýyklykda maksat goýlanda, işiñ şowly bolýanlygy mälim ahyry.

5.Mätäje kömek etseñ…
Gorka, howsala garşy göreşmegiñ örän netijeli usullarynyñ biri-goldawa mätäjehemaýata ýetişmek. Bu ýeñil-ýelpaý iş däl. Emma kimdir biriniñ durmuşyny ýeñilleşdirmek, ykbalyny gowulyga tarap özgertmek üçin äden ädimleriñ miwesini göreniñde döreýän kanagatlanma, şatlyk duýgusy ýagşylyk edeniñe juda degýändir. Muny başarýanlar howsaladan, ünjüden azatdyr, erkindir.
Islendik adamda oñatlyga ynanmaga, umytly ýaşamaga delil bar: elmydama güýz bilen gyşdan soñ bahar bilen tomus gelýändir. Bu düzgüni üýtgedip biljek güýç ýokdur.

6.Duýgularyñ “emri” bilen döreýän endikler
Käte adam özem duýmazdan elini gaşaýar, häli-şindi burnuny elleýär, kellesini silkýär, dyrnagyny “gemirýär” ýa-da dodagyny dişleýär. Bular-içki dartgynlygyñ alamaty. Daş-töwerekdäkilerden ýaşyrylýan, köpe görkezilmejek bolunýan erbet duýgular: gahar-gazap, öýke, howsala ýokarda beýan edilen endikler arkaly ýüze çykýar. Basyrylyp ýatyrylýan duýgular zerarly dörän içki dartgynlyk daşary “pürkülmek” üçin çykalga gözleýär. Gorag ulgamy hokmünde gelşiksiz endikler döreýär. Içki dartgynlylygyny, özüñi gynanýan duýgularyny endige öwrülen hereketleri bilen ýüze çykarmak köplenç arkaýyn, rahat, sypaýy bolmaga çalyşýan adamlara mahsus. Olara şeýle maslahat berip bolar: erbet duýgularyñ añlamagy we olary köpçülik üçin Kabul ederlikli usulda daşary çykarmagy başarmaly. Gaharyñy getiren, göwnüñe degen adamyñ bilen açyk gepleşip, düşünişmeli, syrdaşyñ bilen iç döküşip, ýüküñi ýeñletmeli.

7.Şu günüñe şükürli, ertiriñe umytly seretmeli
Bir akyldar aýtmyşlaýyn, durmuşda ýakymsyzlyklar hem ýeterlikdir. Ýöne ömri bagtyýar etmek her kimiñ öz elinde. Häzirki ýaşaýşyñdan kanagatlanmagy başarmaly. Barmagyña tiken çümende, gözüñe çümmänine begenmeli. Bir ýeriñe ýara çykanda, maýyp-müjrip, ker ýa-da kör däldigiñe şükür etmeli. Başgaça aýdylanda, eger ýagdaýy üýtgedip bolmaýan bolsa, oña bolan garaýşyñy üýtgetmeli.

8.Ünsüñi sowmak peýdaly
Sport, syýahat, gyzykly kitaplary okamak, spektakllara, filmlere tomaşa etmek, täze hünäri özleşdirmek ýa-da daşary yurt dillerini öwrenmek seni horlaýan, ynjalykdan gaçyrýan pikirlerden ünsüñi sowýar, ähli zada başgaça garaýşyñ döremegine itergi berip, içki dartgynlylygy ýeñip geçmäge kömek etýär. Gaty gaharyñ gelende, odun çapmak, gap-gaç ýuwmak, ellik örmek, keşde gaýamak, haly dokamak ýaly işler hem içki dartgynlylygy aýyrýar.

9.Kesel kelleden başlanýar
Käte ýeke özüñ oturyp, aglamak peýdaly. Gözýaş bilen çykman, gözlerde doñup galýan hesret soñabaka içki agzalary “agladýandyr”. Keselleriñ aglabasy adamyñ ruhy ýagdaýy, psihikasy bilen baglanyşyklylykda ýüze çykýar.

10.Geçmişiñ “yañy”
Içki şahsy gapma-garşylyklaryñ aglabasy öz gözbaşyny geçmişden alyp gaýtýar. Adamyñ durmuşynda ylalaşmaýan, üýtgedesi gelýän, yöne üýgedip bolmaýan wakalar ýüze çykyar. Adam şol wakalary zol-zol ýatlap, ýanyp-bişýär. Geçmişiñ käbir pursatlaryny añynda jikme-jik suratlandyryp, hem özüni gynaýar, hem ýanyndakylary. Şeýle adamlara “Geçeni geçdi biliñ!” diýesimiz gelýär. Ýonuşgany ýonmak nämä gerek?!

11.Bagyşlamagy başaryñ
Kimdir birini ýigrenip ýaşaýan adam dine özüne ýamanlyk etýändir. Ýüregiñde yza galdyran adamy öz ýanyñdan başarmaly. Şeýle ýagdaýa düşeniñizde bir akyldaryñ: “özüñe ýagşylyk etjek bolsañ, ýamanlyk eden adamy duşmanyñam bolsa söý!” diýen pähimine eýeriñ!
Ruhyñyz belent bolsun, mähriban teswirdeşler!!!  🙂