Göz göwündäkini görýär

Gadym eýýamlarda hemishe shäheriñ derwezesiniñ agzynda oturýan bir derwüsh bar eken. Günlerde bir gün gaty uzaklardan gelen myhman ýigit ondan:

- Atam, men bu shähere ilkinji gezek gelip görýärin. Bu ýerde nähili adamlar ýashaýar? - diýip sorapdyr. Derwüsh myhmanyñ özünden:

- Seniñ öñki ýashan shäheriñde nähili adamlar ýashaýardy? - diýip sorapdyr. Myhman özüniñ ozalky ýashan shäherindäki adamlaryñ ýaramazdygyny, sahawatsyzdygyny, ol shäherden gaýdandygyna sähelçe-de gynanmaýandygyny aýdýar. Myhmany ünsli diñlän derwüsh oña:

- Bu shäherde hem edil sholar ýaly adamlar ýashaýar - diýip jogap beripdir.

Biraz wagtdan soñra uzak shäherlerden gelýän bashga bir myhman derwezäniñ agzynda otyran derwüshe shol öñki sowaly berýär. Ol bu myhmandan hem öñki ýashan shäherinde nähili adamlaryñ ýashaýandygyny soraýar. Myhman:

- Ol ýerde diýseñ zähmetsöýer, päk ýürekli, mylakatly adamlar ýashaýardy. Men olaryñ köpüsi bilen dost boldum. Ol shäherden hiç gaýdasym gelmedi - diýip jogap beripdir. Derwüsh bu myhmana hem:

- Bu shäherde hem edil sholar ýaly adamlar ýashaýar - diýen jogaby beripdir. Bularyñ söhbetini dashyndan diñläp duran söwdagärleriñ biri derwüshden:

- Eý, Ýaradanyñ söýgüli bendesi, sen näme üçin shol bir sowala aýry-aýry jogaplary berýärsiñ - diýip sorapdyr. Derwüsh söwdagäre:

- Her kimiñ dünýäsi öz ýüregidir. Eger kimdir biri öñki gelen ýerinde ýekeje gowy zat tapmadyk bolsa, bu ýerdenem tapmaz. Eger kimdir biri bashga shäherde köp dost gazanan bolsa, bu ýerde hem dostsuz galmaz. Adamyñ gözi dashynda hem bolsa, diñe öz içindäkilerini görýändir - diýip jogap beripdir.