Gahar-gazap.

Muhammet ibn Ajlan[1]: «Şeýtana iň
ýigrenji görünýän adam ýagşy häsiýetli alymdyr. Alym gürlese, ylymly gürleýär.
Dymsa ýagşy häsiýeti bilen dymýar. Şeýtan: «Alymyň dymmagy maňa onuň
gürlemeginden agyr degýär diýýär» diýip gürrüň berýär.

Ybraýym Edhem: «Men gahary gelende gaharyny ýuwudyp, gürlemezligi
başarýan musulman doganymy ýigrimi ýyl bäri gözleýän we entek hem tapyp
bilemok» diýýär.

 Muhammet alaýhyssalam: «Adam ogly gaharlananda onuň içine köz
oklanan ýaly bolup, gözleri gyzaryp, bedeni galpyldaýandyr. Kim-de kim özünde
şeýle sypatlaryň ýüze çykandygyny duýsa, eliniň aýasyny ýere ursun» diýýär.

Isa alaýhyssalam: «Gaharlanýan adama Allatagala gazaplanýandyr» diýýär.

 Zeýnelabydyn Aly ibn Hüseýin: «Allatagalany iň gazaplandyrýan
zatlaryň biri adamyň adama gaharlanmagydyr» diýýär.

 Töwratda: «Gaharlananyňda meni ýatla, akmaklyk edene akmaklyk
bilen jogap berjek bolma. Eger zuluma duçar bolsaň, sabyr et. Ýerde ýaşanyňda
meniň adamzat üçin döreden asmandaky jennetimi gazanmaga çalyş. Gaharlanyp bir
adamyň üstünden gazanan ýeňşiňden, jenneti gazananyň haýyrlydyr» diýilýär.

Bir adam Muhammet pygamberden:

— Iň erbet zat nämedir? — diýip soranda, ol:

— Allanyň gazabyna duçar bolmak — diýýär.

Ol adam:

— Nädip Allanyň gazabyndan gaçyp-gutulyp bolar? — diýip soranda,
Muhammet alaýhyssalam:

— Gaharlanman — diýip jogap berýär.

 Abu Hureýra: «Göreş tutup ýykan däl-de, gahar-gazabyny basyp
bilýän adam güýçlidir» diýýär.

Bir gezek Dawut alaýhyssalam Süleýman alaýhyssalamyň bilimini barlap
görmek üçin ondan:

— Ýanyp duran közden güýçli näme bardyr? — diýip soranda, Süleýman:

— Gahar-gazap — diýip jogap berýär.

Dawut onuň bilimine göwni ýetýär.