Duzun Gadyry (erteki soyyanler u/n)

Bir bar eken, bir ýok eken. Gadym zamanlarda bir goja patyşa bar eken. Goja patyşanyň üç sany gyzy bar eken. Günlerde bir gün patyşa gyzlaryny ýanyna çagyryp, olara ýüzlenýär:
-Hany, aýdyň, balalarym! Pederiňizi gowy görýärsiňizmi?
Şonda patyşanyň uly gyzy:
-Elbetde, sizi älem-jahany halaýşym ýaly gowy görýän-diýipdir.
Ikinji gyzy bolsa:
-Kyblam -atam jan! Sizi dünýä ýaly görýän. Siz bolmasaňyz, bu dünýä-de, belkem, bolmazdy -diýipdir.
Patyşa uly gyzlarynyň bu sözlerine juda begenipmiş. Iň kiçi gyzy bolsa:
-Kakam jan, sizi duz ýaly gadyrly görýän -diýip, beýleki gyzlaryndan has täsin jogap beripdir.
Patyşanyň körpe gyzynyň jogabyna gahary gelipdir:
-Heý, pederiňem bir şeýle kiçi zada deňäp bolarmy -diýen patyşa körpe gyzyny köşkden kowup goýberipdir.
Şanyň körpe gyzy az ýöräp-köp ýöräp, bir obanyň çetinden barypdyr. Ine, şeýdibem, şol obada bir barly hojalygyň öý-içerisiniň işlerini edip, gün-güzeranyny aýlap başlapdyr. Wagtyň geçmegi bilen patyşanyň körpe gyzy ulalyp, owadan zenan bolup ýetişipdir. Onuň gözelligi ilden-ile, dilden-dile ýaýylypdyr. Kysmaty çüwen gyz başga bir patyşanyň ogly bilen durmuş gurupdyr.
Aradan aýlar geçipdir, ýyllar geçipdir. Patyşanyň gyzy öz ýanýoldaşyna başyndan geçenleri aýdyp beripdir we pederini myhmançylyga çagyrmagy teklip edipdir. Ýanýoldaşy onuň bu pikirini goldap:
-Taýýarlygy özüm görerin -diýipdir.
Ähli taýýarlyklar görlenden soňra körpe gyzyň kakasy myhmançylyga gelipdir. Saçak näz-nygmatdan dolupdyr. Ýöne patyşanyň körpe gyzy aşpezlerine tagamlaryň ählisini duzsuz taýýarlamagy tabşyrypdyr eken. Saçagyň başyna geçilipdir. Patyşa haýsy tagama elini uzatsa-da, onuň duzy ýoklugy sebäpli iýip bilmändir. Patyşanyň myhmançylykdan o diýen mazasy bolmandyr. Muny aňan şanyň körpe gyzy:
-Şahym, körpe gyzyňyz sizi duz ýaly görýär eken, emma näme üçindir siz ony köşkden kowupsyňyz. Hut şol sebäpdenem tagamlaryň ählisi ýörite siziň üçin duzsuz taýýarlandy. Belkem, siz tanansyňyz. Men şol körpe gyzyňyňyzda -diýip, kakasyna ähli zady aýdyp beripdir.
Patyşa etmişine ökünip, gyzyny mähirli gujaklapdyr. Şeýlelikde, täze şatlykly günler başlapdyr, patyşa öz gyzlary bilen agzybirlikde, şatlykly-begençli ýaşapdyr

Ertekini haladynyzmy?

Hawa(100%, 7 adam)

Yok(0%, 0 adam)

ay bosh oturandan okasa boljak(0%, 0 adam)