Ýagşy

GarrySerdar· · 543 gezek okaldy· halanan: 17teswirler.com

Halal-haram parhyn bilgin nebsim sen
Zannyňda haramlyk bolmany ýagşy
Iýseň-içseň saýlap iý-iç nebsim sen
Damaga haram nan barmany ýagşy

Çykma Alla we resulnyň dininden
Gowsy aç gal kişi hakyn iýenden
Minnetli çeşmeden ganyp doýandan
Minnetsiz bir owurt ajy suw ýagşy

Özüňe şygar edingin mertligi
Ýumrugyňda berk sakla erkinligi
Maksat etgin ilde agzybirligi
Pitne çykarandan dogmanyň ýagşy

Eliň öten zadyn eliň bilen düz
Sözüň öten zadyn sözüň bilen düz
Emma şahyr, ilki öz nebsiňi düz
Zat düzmänkäň özüň düz bolsaň ýagşy

Pul diýip, mal diýip aşa ylgama
Arasynda maý goý dynjyň almaga
Hak ýolunda bäş wagt eglip-galmaga
Niýet edip käte duranyň ýagşy

Şükür etmelisiň etmelä şükür
Berlenler barada etmeli pikir
Sakçy bilen dostlaşyp, kikir-kikir 
edenden, Eýesin tananyň ýagşy

Men-men diýip öz-özüňi beýgeltme
Gerekli-gereksiz sussuň peseltme
Dogry bileniňden oňarsaň, gaýtma
Ulydan maslahat alanyň ýagşy

Şahyr bu durmuşyň tagamyndan dat
Rysgal gözle, ylga, kän ýatma rahat
Soňam tapanyňa edip kanagat
Mähribanlaň bilen iýeniň ýagşy

19 Iýun 2011

Arhiwiň ýagdaýy

● Doly tekst

● 26/26 teswir saklanypdyr

Ýazylan saýty: teswirler.com · Çeşme: Web Archive nusgasy — ertir.com, 3 maý 2012 ý. · Asyl sahypany gör ↗

Teswirler 26

GarrySerdar 20 iýun 2011 ý. 08:29 +2
Define:
Serdar aga, tüweleme oňat goşgy ýazasyňyz gelýär. Höwsli görünýäňiz. Geçen söhbetdeşlikde ýazýan goşgularyňyzyň derňelmegini isläpsiňiz öýdýän. Al onda kelam agyz:

Goşgy düzüliş formalaryny gowy öwrenmeli: kapiýa, redif, bogun; bular möhüm zatlar. Goşgyny bezeýärler. Çeperçilik taýyndan güýçlendirýär.

Siziň bu goşgyňyz-a gelenimizde: ýagşy diýen söz redif bolup gaýtalanyp gelýär. Olaryň öňünden geljek sözleriň kapiýasy bolmaly. meselem: bolmany, barmany, dogmanyň, iýeniň, alanyň... kapiýa däl. şu görnüşde bolsa gowy bolar (mysal üçin):  almanyň, salmanyň, galmanyň....

Bogun meselesine gezek gelende:

Özüňe şygar edingin mertligi
Ýumrugyňda berk sakla erkinligi
Maksat etgin ilde agzybirligi
Pitne çykarandan dogmanyň ýagşy

Bogunlar: 4x4x3 / 6x5 bolmaly.

Gaty görmek ýok. Goşgynyň ýagdaýy şeýle. üstünlik!

Ýene bir ýola sagbol @Define.
Garaz edebiýat okamadygym belli boljak-da.
Siz tankydy gysganmaň, men düzeljek bolaryn nesip bolsa.

Define 20 iýun 2011 ý. 08:31 +1

Estagfurulla. Meň niýetim tankyt däl. Seň höwesiň bolansoň, biraz düzedeýin diýdim!
Sagbol! Galamyň ýiti bolsun!

GarrySerdar 20 iýun 2011 ý. 08:38 +1
Define:
Estagfurulla. Meň niýetim tankyt däl. Seň höwesiň bolansoň, biraz düzedeýin diýdim!

Sagbol! Galamyň ýiti bolsun!

Tersine tankyt edilse gowy görýän men. Şeýdip ösülýär, ilerlenýär.
Arada öňki çyrşan zatlaryma seretdim, indikilerden parhy gowy bildirýär. Bu tapawut şol tankytlaryň we düzedişleriň hasabyna bolýarmyka diýýän. 
-Maňa bir harp öwredeniň kyrk ýyl guly bolardym- sözi bilen meniň ýetirjek bolýan minnetdarlygym aňrybaşy bilen aýdylypdyr.

mcd 20 iýun 2011 ý. 08:56 +1

Dost brawo!!!👏     (+++)