Enthomophobia (suratly)

Giriş


Birnäçäňiz bu nämekä diýip oturansyňyz, birnäçäňiz hany göreýin awtoryň özi aýtmadyk bolsa google'dan serederin diýip oturansyňyz. Belki eýýäm bilýänleriňizem bardyr.
Kän gynap oturmaýyn enthomophobia adamynyň mör möjeklere garşy bolan gorkusy. Aňsat sypyp bolmaýan keselleriň biri diýip görkezilýär. Men öz başymdan geçen bir-iki hadysadan söňra bu mör-möjekden gorkma hadysasynyň ylmy esasy barmyka diýip seredişdirdim. Muny sizler bilen paýlaşasym gelýär.

I

Bir bazar güni Teke bazardan Bagyr obasyna gidýän gazel maşynlaryň durýan duralgasyna bardym. Bir-iki kişilik ýer galan eken, ýöne maşynyň içi dykylyp pagta doldurulan partyk ýalydy. Ýöne ap-ak däl-de gyzyl-ýaşyl we her hili reňkdäki pagtalar ýalydy. Mahlasy, diňe aýal adamlardy. Ýaşulyraklary, orta ýaşlyraklary, ýetginjekleri we çagalara çenli aýal-gyzlardy. Öň tarapda sürüjiniň kabinasynda iki erkek bardy welin ol ýerde-de ýer ýokdy-da. Eýtdim beýtdim oturdym orta gürplerdäki oturgyçda. Ýanymda-da özi daýaw ýaşy daýaw bir daýza oturdy. Ýola çykdyk. Derrew özünden iki metr öň tarapda beýleki bir daýza bilen gybata başlady. Menem hernäçe dar bolsa-da ýanymdaky sumkamdan kitabymy çykardym okamaga başladym. Has dogrusy okajak boldum.
Bir tarapdan daş töweregiň täsiri, bir tarapdan kitabyň aňlatýanlara düşünjek bolmak, bir tarapdan daýzalaryň gulagyňa girip gelýän gybatlary.. şol barmana meniň ünsümi ýene bir zat çekip başlady. Birhili köwşümiň içinde jorap näsaz geýilen ýaly duýdum. Barmagymy eýläk beýläk eden boldum we kän üns bermedim. Soň jorabyň näsaz oturmaklygy anomaliýasy gymyldan ýaly boldy. Ýagdaýa düşündim we asuda hereketler bilen ilki kitabymy ýerleşdirdim, soňra garynjygyma agram salyp köwşümiň bagjygyny çözdüm we aýagymy çykardym. Görsem ynha bir çekirtge, mysapyrsyrap otyr.
Elime aldym ony we ilki kelläme gelen hereket - adatça edilmelisi deý zyňyp goýbermek boldy. Soňra bolsa daş töweregimdäki adamlaryň entomophobiasy meňkiden köpräk bolmagynyň ahmaldygy kelläme geldi we gopup biljek goh-galmagaly göz öňünde tutup, dessine ony sumkanyň beýleki jübisine goýdum.
Soňra ol janawer ýadymdanam çykaýypdyr. Ertesi gün, eýýäm Aşgabada gaýdyp gelip, irden işe gitjek bolup durkam, ol ýadyma düşdi. Sumkamyň şol jübisini açdym welin oturan eken, akyllyja bolup. Çykaryp tebigata goýberdim.  

II

Ýokarda aýdyp beren wakamy işýerimizdäki çaý suw getirýän Sülgüne aýdyp beren wagtym onuň entomophobiasynyň çak edip biljegimden has ýokardadygyny bilip galdym. Diňe şu wakany aýdyp bermegiň özi meni birnäçe sekuntlygyna 'däli' adyna eýe etdi we tas hemişelik onuň elinden çaý içme rartykmaçlygyndan mahrum edipdi. 
Şol güniň öýlesinden soň wagtlary goňşy otagyň tutysyny çekip duran wagty WAAAÝ-lap ses eden çaýçymyzyň dadyna ýetdim. Näme boldy diýsem asyl, bir ullakan, nejis, gara ýigrenji bir zat gaçaýypdyr tutydan. Howply möý ýaly bir zat däldigini sorap bilenimden soň azajyk gaharym geljek boldy. 'Al, iýer-ow şol seni' ýaly gürrüňler etdim. Ol bolsa iňir iňir bilen otagyň hemme garnituryny diýen ýaly galdyrtdy, şonda bilim sypyp gaçandyr öýtdüm. 
Bir inžener ýetmedi, Sülgünimiz bu Watançylyk urşuna kärdeşim we ýoldaşym Rahady sokdy. Gaharyma '15 ýyl okap inžener bolup, bir tomzagyň yzynda ylgap ýören iki adam-da biz' ýaly gürrüňler edýärdim. Iň soňunda gorkunç tomzagy tutmak bagty(!) Rahada nesip etdi. Çaýçymyz ary galan jellat ýaly ony öldürtjek bolup kän dyrjaşdy, ýöne Rahat mertlerçe bu süteme çydady we daşary çykyp ony erkinlige goýberdi.

Sözsoňy

Siziň hem başyňyzdan şeýle wakalar geçendir, ýa-da geçenleri tanaýansyňyz. Paýlaşyň we tebigatymyzyň aýrylmaz bölegi bolan bu kiçijik dostlarymyz barada bilgimiz artsyn. Bildigimizçe-de gorkymyz azalsyn. Sebäbi adam, bilmedigine duşmandyr.
Bu hekaýadaky gahrymanlar hakyky durmuşdan alynan bolup olaryň atlary we wezipeleri üýtgedilen bolup biler.
Bu hekaýada hiç hili jandara zyýan ýetirilen däldir.