Hadys-35(otuz bash)

SADAKAÝI JARIÝE
Enes ibn Mälik (radyýAllahu anhu) aýtmagyna görä Resulullah (sallaLlahu aleýhi we sellem) aýtdylar: „Musulmanlaryň biri agaç ekse ýada başga bir zat ekse we şol eken zadyndan guş, adam ýada haýwan iýse, şol eken adama sadaka hökmünde ýazylar“. (Buhary rowaýat edýär).
ŞERHI: Musulman öz ömründe ýagty yz goýup gitjek bolmalydyr. Onuň eden işi ol ölenden soň hem oňa ahyretde sogap getirip durup, bu dünýäde bolsa adamlara peýda berip durar ýaly bolmaly. Şeýle işlere Yslamda „Sadakaýy jariýe“ diýilýär. Bu hadysda hem şeýle galyjy we dowamatly sogap getirýän işlere üns berilmegi ündelýär. Sebäbi musulman adamyň ömrüniň manysy şoldyr, ýagşylyk Yslam ýolunda dogry iş, galyjy iş edip gitmek we ynsanyýetiň ösmegine, kämilleşmegine öz goşandyňy goşmany başarmakdyr. Hatda diňe adamlara däl, Allahyň (jelle jelaluhu) ýaradan bütin jandarlaryna ýagşylyk etseň şol sogap bolup ýazylmaga dowam etjekdir. Edil şolar ýaly mu'min adamlary dogry ýola gönikdirýän ylmy eser, terjime, düşündiriş, dagwat goýup gitsede, ol adam şol çeşmelerden peýdalanan adamlaryň sogap we ýagşy dileglerini almaga dowam eder. Adamlar üçin metjit salsa, köpri gursa, suwsyz ýere suw eltse, ine bularyň hemmesi sadaka-i jariýe we adam ölse hem oňa sogap baryp durjak zatlar. Kim bilýär, belki günäsi sogabyndan köp bolan musulmanyň azapdan dynmagyna we Jennete girmegine sebäp bolar. Mu'min bir işi halys Allah (jelle jelaluhu) üçin etse, onuň netijesi şol wagt göze görünmesede iru-giç özüniň bardygyny görkezer. Allah (jelle jelaluhu) adamyň zerre ýaly ýagşylygyndan hem, zerre ýaly günäsinden, ähli pikir küýlerinden, kalbyndaky hemme niýet we duýgylaryndan habardardyr. Musulman möhüm we galyjy işlere ýapyşmaly, onuň üçin bolsa yhlas, sabyr we dowamatlylyk gerek. Aslynda bir mu'miniň ömrüni şu ýolda geçirip gitmegi hem birnäçe adamlar üçin ybratdyr. Şonuň üçin musulman doganlar, şu amallary yhlas bilen edip, Allah (jelle jelaluhu)-yň rahmetine ýetjek bolalyň.