Aýdymlarym şum ykbalym hakdadyr

Ýüregim bir uly şatlygy syzýar,
Gideýin men, kän garaşdym, bes indi.
Aprelde sähralar bolsa-da yzgar,
Bar ýürekde ýylanmaga kesindi.

Janlansyn usurgan damarlam meniň,
Ýuwuş suwy goýberilen keş deýin.
Ýylakly meýdana owkalap tenim,
Boz torgaýyň nagmasyny eşdeýin.

Ýagyş suwy püre-pürlän kaklaryň
Ýakasynda dikeldeýin çalmarym.
Il gözüne utançly bakmaryn
Könelse-de, geýip gelen jalbarym.

Agşam toşap ýaly gök çaýdan boşan
Käsä dolan Aýyň ýüpek şöhlesin
Içip, ykbalymdan bolaryn hoşal
Azalsa-da ömür diýen möhledim.

Dünýä inip mähir bilen gundalan
Göbek ganym siňen ýaýlam, Ýerbendim.
Bigamlara hemra bolup munda men
Senden gidip, şowsuzlykda sermendim.

Aşyk bolup baky bahar paslyna
Heňňam içre ham-hyýala münmedim.
Ýakyn boldum ynsan diýen aslyma
Unutsam-da musulmanlyk sünnedin.

Ýöne hiç kim maňa gülüp bakmady,
Yşkymy aňmady göreçlerimden.
Aýdymlarym şum ykbalym hakdady,
Şondan zyýat aýdym döretmedim men.

Burkut ataň talaň salnan göçleri
Aglap-diňse, gözýaşlary gowzasa,
Azalmady hesretimiň möçberi,
Ýagty dünýä döndi maňa dowzaha.

Men ýagty jahandan yşk gözledim
Tümlük baglan çagy didelerimi.
Ýat göwünlä bagş etmäge dözmedim
Köplümdäki polýar gijeligini.

Onsoň howandarym sähra dolandym,
Dumanly ýaýlanyň ümsüm döwründe.
Sähram!
Bagyşla ykbalyň şeýle bolanny
Arzuwlarym köýüp galan ömrümde.

Awtory Çary Ýegenmyradow.