Eneler Güniňizi Gutlaýan!

Bir sebäp bilen bu gün eneler güniniň şanyna gurnalan bir üýşmeleňe gatnaşdym. Eneler gününi gutlamak musulmançylykda kän halanmasa-da (belki türkmençilikde-de şeýle) olaryň şanyna her gün baýram edip gutlasak ýeridir. Alymlardan biri munyň bilen baglanyşykly “eneleri 365 güniň birijigine sygdyryp onda-da diňeje bir gülle olaryň göwnünden turmanyň hyýallaryny etmek, ne geň” diýip belleýär. Bu ýewropa döwletlerinde şeýle bolmana çemli…
Eneler hakda aýdara söz köp, olary bu ýerde kän wasp edýärler. Eneler güni, dünýäniň her künjinde tapawutly günlerde gutlansa-da aglabasy maý aýynyň ikinji bazar güni (ýagny ertir) gutlaýar ekeni(çeşme üçin seret!) Enelere her gün her sagat sylag-hormat goýmak gerek bolsa-da bu baýramçylyk bahanasy bilen göwünlerini tapmanyň ýollaryny gözlemegiňizi maslahat berýärin. Menem kän ýatlap baramok ene-atamy, ýöne sebäp tapsam bahana etmäni hiç zatça göremok. Programmany bahana edip ýatladym men olary we size-de ýetireýin diýdim. Olar üçin näçe bahana gözlense azdyr, şeýle dälmi?!

"Ýagşy sözler gaýnap ýürekden çyksyn,
Şol närseden bärde çyksa hiç bolar."
***
"Erte tapylanok bu gün göreniň.
Şu gün çoýuň, erte, belki giç bolar." 
Berdinazar Hudaýnazarow

Ýa-da käbirlerine giç bolandyr eýýäm… 
Olaram, sessiz gijäniň tümlüginde näme etjeklerini bilýändirler, "ýokmy yzymyzdan göz ýaşyna boýanan dodak pyşyrdamasy" diýýänlere. Olaram bu baýramy bahana edip ýatlamak gerek, belki bu ýagdaýda dileglerimiz umumy bolup kabul bolar!

Soranmyş bir ene şahyra bakyp,
Dünýäniň durky ne aýdyp bersene?!
Şahyr hem diýenmiş dyzyna çöküp:
"Dünýäniň bar durky ene sen ene"

Gurbandurdy Gurbansähedow

Pursatdan peýdalanyp hemmäňiziň mähriban eneleriňiziň we şol sanda ene bolan agzalarymyzyň “eneler gününi” gutlaýan! Goý enelerimiziň ýüzleri solmasyn! Elmydama size guwanyp gezsinler...