Bir wagtlar ýazypdym

Ýylgyryş

Bu iş beýle kyn däl oň zähmeti ýok,
Şeýle ýüze hiç wagt ýygyrt düşmeýär.
Gamly ýüze bolsa hemmäň garny dok,
Ýylgyranyň bilen älem süýşmeýär.

Bakan her ýüzünden bir dost edinýär.
Şatlyk paýlaýar ol älem-jahana.
Dünýäde geň açyş etmeli bolsa,
Şonda açardym men – “ýylgyryşhana”.

Ýylgyryş – bezeýär adamçylygy,
Ýylgyryş – berilýän iň gymmat sowgat.
Ýylgyryş – ýatladýar oňat gylygy,
Ýylgyryş – adama sylag hem hormat.

Ýylgyr gursagyňda derdiň bolsa-da,
Ýylgyr bir gün durmuş saňa-da güler.
Gursagyňa gussa näçe dolsa-da,
Dostuň ona ýylgyrşyňdan düşüner.

Gussaňyzy gizläň ýylgyryş bilen,
Goý ýylgyryş sizi dertsiz görkezsin!
Açylan gül ýaly paýlan söýgüňiz,
Ýylgyrşyňyz bilen dünýäni gezsin!