Anil Kapura “Ýerine ýetirip bolmajak wezipe”

Bolliwudly aktýor Anil Kapur Holliwud filminde çykyş eder. Ol Tom Kruzuň baş keşpde çykyş edýän “Mission Impossible IV” (“Ýerine ýetirip bolmajak wezipe-4”) filminde surata düşer.
2010-10-27 - 04:26Mälim bolşy ýaly, Anil Kapur Danni Boýluň 8 ugurda Oskar gazanan “Külbeden çykan millioner” (Slumdog Millionaire) filminde-de esasy keşpleriň birini janlandyrypdy. 50 ýaşly  aktýor özüniň bu keşbi bilen baglanyşykly teleýaýlymlaryň birine beren beýanatynda şeýle diýýär: “Meniň üçin bu filmde çykyş etmek uly abraý. Aýratynam Paula Patton, Jeremi Renner, Tom Kruz ýaly artistler bilen bir filmde surata düşmek meni diýseň begendirýär”. Karýerasy boýunça ençeme filmde surata düşen Anil Kapur filmiň Wankuwerde düşüriljek sahnalarynda oýnar. Ýagny ol dekabr aýynda Kanada döwletine barar. Häzirki wagtda surata düşüriliş işleri ýokary depginde alnyp barylýan film 2011-nji ýylda kinoteatrlarda peýda bolar. Filme Bred Bird režissýorlyk edip, kinonyň öňki 3 bölümi prokatdan ep-esli girdeji gazanypdy. 
(Zaman-TM)