London 2012-ä barýan ýolda indiki garşydaşymyz - Siriýa

London-2012 Olimpiýa oýunlarynyñ saýlama tapgyrynda garşydaşymyz - Siriýa

2012-nji ýylda Londonda geçiriljek XXX Olimpiýa oýunlarynyň Aziýa saýlama ýaryşlarynyň ikinji tapgyrynda türkmen futbolçylary Siriýanyň ýygyndy topary bilen bäsleşer. Malaýziýanyň paýtagtynda ýerleşýän Aziýanyň futbol konfederasiýasynyň ştab-kwartirasynda şu gün geçirilen bije atyşlygyň netijeleri şeýle boldy.

Siriýanyň we Türkmenistanyň toparlary bilen birlikde toparlaýyn ýaryşa ýollanmalar ugrunda Katar-Hindistan, Yrak-Eýran, Bahreýn-Tailand, Awstraliýa-Ýemen, Ýaponiýa-Kuweýt, KHDR-BAE, Koreýa Respublikasy-Iordaniýa, Özbegistan-Gonkong, Saud Arabystany-Wýetnam, Hytaý-Oman, Liwan-Malaýziýa bäsleşerler. Ilkinji oýunlar birinji görkezilen toparlaryň meýdanlarynda 19-njy iýunda geçiriler. Jogap oýunlary şu ýylyň 23-nji iýunynda bolar.

Ikinji saýlama ýaryşlaryň jemleri boýunça güýçli komandalaryň 12-si üç topara bölüner. Toparlaryň ýeňijileri öňde boljak Olimpiýa oýunlarynyň futbol ýaryşyna gatnaşarlar. Şonda goşmaça aýlaw ýaryşynda ikinji orny eýelän toparlar 2012-nji ýylda Londonda geçiriljek oýunlara ýene bir ýollanma ugrunda bäsleşikde yklymara ýaryşa gatnaşyjyny kesgitlärler.

Siriýanyň futbolçylary bilen türkmenistanlylar ozal diňe milli we ýaşlar ýygyndylarynyň derejesinde duşuşypdylar. 2003-nji ýylda Aziýa Kubogy-2004 saýlama ýaryşynyň çäklerinde bäsdeşler Aleppo şäherinde 1:1 hasabynda deňme-deň oýnadylar. Şondan dört ýyl geçenden soň Aziýa-2008 çempionatynyň ýaşlaryň arasynda (19 ýaşa çenli) Dohada (Katar)geçirilen saýlama ýaryşynda biziň toparymyz siriýalylardan 3:0 hasabynda ýeňlipdi.

Olimpiada-2012-iň birinji saýlama ýaryşlarynda Türkmenistanyň futbolçylary Indoneziýanyň toparyny olaryň meýdançasynda 3:1 hasabynda, Aşgabatda bolsa 1:0 hasabynda ýeňmegi başardylar.

www.turkmenistan.gov.tm