Türkmen oba hojalyk uniwersiteti (TOHU)

Salam hormatly agzalar! Giç ýagşy!

Bilşimiz ýaly, Türkmenistanda 20-ä golaý ýokary okuw jaýlary bar. Şol ÝOJ-larda Türkmenistanyñ dürli pudaklary boýunça geljekki hünärmenler taýýarlanylýar. Şu temada Türkmenistanda ilkinji açylan ÝOJ-laryñ biri bolan S.A.Nyýazow adyndaky Türkmen oba hojalyk uniwersiteti (TOHU) barada maglumatlar ýazmakçy.

S.A.Nyýazow adyndaky Türkmen oba hojalyk uniwersiteti ýurdumyzyň oba hojalyk pudagy üçin hünärmenleri taýýarlaýan iň uly ýokary okuw mekdebidir. Ozalky oba hojalyk instituty hökmünde tanalýan bu uniwersitet 1930-njy ýylda esaslandyryldy. Oba hojalyk inistituty 1998-nji ýylda S.A.Nyýazow adyndaky Türkmen oba hojalyk uniwersitetine öwrüldi. Bu uniwersitetde geçen 80 ýylyñ dowamynda 40 müñe golaý oba hojalyk pudagy üçin hünärmenler taýýarlanyldy. Uniwersitet her ýyl 430 töweregi adam kabul edýär. Häzirki wagtda TOHU-da 2000-e golaý talyp okaýar.

TOHU-da oba hojalyk hünärmenlerini taýýarlaýan fakultetleriñ 7-sinde jemi 22 sany hünär bar.
Fakultetler we hünärler:

"Oba hojalyk önümlerini gaýtadan işlemek" fakulteti.
1. Miwe-gök önümlerini gaýtadan işlemek
2. Et-süýt önümlerini gaýtadan işlemek
3. Dänäni gaýtadan işlemek
4. Pagtany ilkinji işlemek
5. Ösümlik ýagyny öndürmek
"Agronomçylyk" fakulteti.
6. Ekerançylyk
7. Bagbançylyk we gök ekerançylyk
8. Ýüpekçilik
9. Agrohimiýa we topragy öwreniş
10. Ösümlikleri goramak
11. Tokaý hojalygy
"Gidromeliorasiýa" fakulteti.
12. Suw hojalygy
13. Ýer ulanyş
"Oba hojalygynyň ykdysadyýeti" fakulteti.
14. Oba hojalygynyñ ykdysadyýeti
15. Oba hojalygynda buhgalterçilik hasaba alyş we audit
"Weterinar lukmançylygy" fakulteti.
16. Mal lukmançylyk
17. Maldarçylyk
"Oba hojalyk tehnikalary" fakulteti
18. Oba hojalygyny mehanizmleşdirmek
19. Melioratiw işleri mehanizmleşdirmek
"Dokma önümçiligi" fakulteti.
20. Mata önümçiligi
21. Tikin önümçiligi
22. Tebigy süýümleri egirmek

Uniwersitetde 30 sany kafedra bar we şol kafedralarda professor mugallymlaryň 270-e golaýy işleýär. Ol mugallymlaryñ içinde ylymlaryñ doktorlarynyñ 10-sy, ylymlaryñ kandidatlarynyñ 80-si we dosentleriñ 40-sy bar.

Uniwersitetde 2 sany internet otaglary, 7 sany doly abzallaşdyrylan tejribe-laboratoriýa otaglary we 2 sany multimediýa we interaktiw enjamlar bilen üpjün edilen otaglar bar.

TOHU-da harby kafedrañ (waýenniý kafedra) hem bardygyny ýatladasym gelýär. Harby kafedrada oglanlar harby taýýarlyk okuwyny okasalar, gyzlar lukmançylyk, ýagny maşgala lukmany hünärini ele almak üçin okaýarlar.

Uniwersitetiñ çäginde harby kafedrany hem hasaba alañda 8 sany okuw binasy, 7 sany opşit, 1 kitaphana, uly (750 adamlyk) we kiçi (150 adamlyk) mežlisler zaly, üsti ýapyk (woleýbol, basketbol, küşt, şaşka, göreş) we açyk (uly we kiçi futbol, basketbol, woleýbol, tennis) sport meýdançalary, naharhana we birnäçe tejribehanalar bar.

TOHU-da "Altyn Asyr" medeniýet merkezi bar. Medeniýet merkeze aýdymçylar, tansçylar, sazandalar, şahyrlar gatnaşýarlar.
Şeýle-de uniwersitetde "Hasyl" sport kluby hem bar.
Uniwersitetiñ Aşgabatda, Baýramalyda, Daşoguzda we Türkmenabatda agrotelekeçilik orta hünärment mekdepleri hem bar.

Ýene bir bellemeli zat, TOHU-nyñ "Oba hojalyk tehnikalary" fakultetiniñ "Oba hojalygyny mehanizmleşdirmek" hünäriniň 3-nji kurs talyplary (45 talyp) her ýyl öz okuw praktikalaryny 1 aýlyk Belorussiýanyñ Minsk şäherinde geçýärler. Özem hemme çykdaýjylaryny hökümet çykarýar.

S.A.Nyýazow adyndaky Türkmen oba hojalyk uniwersitetiniñ salgysy:
744012, Aşgabat şäheri, 2009 (Görogly) köçesi, 143; tel: (+99312) 34-07-77.

TOHU barada gysgaça maglumatlar şeýleräk. Sizem Türkmenistanyň ÝOJ-lary barada maglumatlar ýazarsyñyz diýip umyt edýän.

Wagt aýryp okanyñyz üçin minnetdar! 🙂