"Maşgala basan şahyryň elegiýasy"

Häzirki zamanmy, öten zamanmy,
Ýa geljek zamanmy – bermezdim ünsem.
Bu gün öten zaman işligine bakyp,
Uludan dem alyp, oturýan ümsüm.

Indi ençe ýyldyr, söýgi hakynda,
Öten zaman bilen ýazýaryn şygyr.
Eý, taňrym! «Söýýärin» diýmegiň ýerine,
«Söýüpdim» diýmeklik niçiksi agyr.

«Söýýärin sen gyzy, söýýärin!» diýip,
Goşgy ýazýan günlem düýndi-le weli,
Indi goşgy ýazsam «Söýýärin!» diýip,
Çakyp dur her ýandan her kimiň dili.

Goňşularym diýýär: «Alty çagaň bar»
Redaktor diýýär: «Saçyňam çap-çal.
«Söýýän, söýýän!» diýip, gaýtalap ýörmek,
Indi bu ýaşdan soň – gelşikli gep däl.

Özüňe-de nep däl, bize-de nep däl.
Dogry, dogry entek ýaşyňam köp däl.
Bary-ýogy ýaňy ätläpsiň kyrkdan.
Şonda-da on sekiz ýaşly gyz bile,
Ýeri, aýt, näme işiň barmyşyn parkda?»

«A-haw, parka barýan meniň özüm däl,
Liriki gahryman!! Liriki geroý!
Ynanmasaň, ynha Mollanepesem,
Hanha Şipaçewem oka-da göräý,
Biri ýetmişinde, biri altmyşda,
Ikisem hemişe parkyň içinde.
Ýeri, näme, meni jyn urupmyşmy
Aýny ýaşda, ýaňy kyrkyň içinde?»

Diýip, her niçikdir olaň deminden
Müň bahana tapyp sypýaňam welin,
Öýe gelseň çagajyklaň öňünden
Gaçmaga gapy ýok, sypmaga delil.

Körpe ogluň diýýär: «Kaka, aý, kaka,
Goşgyňy gazetde okadyk ýaňy.
Bir gyzy söýýärin diýipsiň weli,
Kaka, söýýän diýýän şo gyzyň hany?»

Ýüzüňe seredip has tokar ogluň,
Gaýta has beterin üstüne goşýa:
«Söýýän, söýýän!» diýip ýörsüň-le, kaka,
Kaka-da gyzlary söýer oguşýa?!»

Ýene-de bir çagaň, has lälik çagaň
Gerşiňe atlanyp, saçyňdan çekip,
Diýýär: «Indikide parka gideňde,
Kaka, şo gyz bilen meni hem äkit!»

Ýeri, enesine näme gerekmiş,
Olam hezil edip gülmäge derek,
Gaýta siltenjiräp, ýüzüni sallap,
Ne-hä çaý getirýär, ne-de bir çörek.
Gaýta hüňürdeýär: «Çaý-suw isleseň,
Şo gyzlaň ýanyna ötäýtmek gerek!»

Garaz, bir tarapdan çagaň, goňşulaň,
Beýleki tarapdan redaktoryň,
Keýwanyň hem – üçülenji tarapdan,
Şolara baglyrak seniň takdyryň.
Biri siltenjiräp, biri öýkeläp,
Biri akyl berip ýuwaş-ýuwaşdan,
«Söýýän!» diýen sözden mahrum etjekler,
Mundanam bir mydar bormy, ýoldaşlar!

Awtory:Kerim Gurbannepesow