Töhmet belasyndan nähili saplanmaly?!.

#TÖHMET BELASYNDAN NÄHILI SAPLANMALY?!.

Halk arasynda töhmet belasyny ot belasyna, suw belasyna deñemekleri ýöne ýere däl. Munuñ özi töhmet diýilýän zadyñ pikir edişimizden hem juda howpludygyny görkezýär. Gynansakda, dürli şahsy we beýleki bähbitleriniñ hatyrasyna, ýa bolmasa görübilmezçilikden we ş.m adamkärçilige gelişmejek ýaramaz häsiýetleri pişe edinenler töhmet atmagy eşege palañ atança-da görenok we aramyzda şeýle adamlar duş gelmän duranok.
Söhbetimizi dini nukdaýnazardan bermek bilen "Töhmet atanyñ we töhmete duçar bolanyñ töhmet zerarly ýitirjek zatlary näme we töhmet günäsinden nähili saplanmaly?" diýen soraglar boýunça çuñlaşdyryp bersek has göwnejaý we düşnükli bolardy.
Hiç bir adam (hiç bir mömin-musulman) töhmet atylmaga mynasyp däldir. Töhmet atmak aç-açan ýalançylykdyr, uly günäleriñ hataryna girýär we haramdyr.
#Töhmet atana geljek zyýany şu görnüşde görkezmek bolar:
1). Atan töhmeti zerarly haram işe baş goşdy, günäkär boldy.

2). Musulmanlaryñ arasynda Allanyñ görmek islän uhuwyýetini, mähir-muhabbetini, ynamy, asudalygy, bagtyýarlygy we parahatçylygy bozmak bilen birlikde şeýtanyñ etjek işlerine ýeñillik döredýär.

3). Özüni Alladan daş düşürýär we Allanyñ gargyşyna ýakynlaşýar.

4). Ýalan sözleýär. Adamlary aldawa salýar. Ýalançylygy orta çykanda bolsa adamlara masgara bolmakdan halas bolup bilmez.

5). Töhmet atan kişisinden razylyk almasa jezasyny hökmany suratda we doly çekmeli bolar. Bu dünýäde kime töhmet atan bolsa, elbetde özi hem edil şonuñ ýaly töhmete duçar bolar. Ahyretde bolsa, Allanyñ hasabyna we jezasyna çekiler.
Allatagala şeýle diýipdir:
#Erbetligi aklyndanam geçirmeýän ar-namysly mömin zenanlara töhmet edenler, gürrüñsiz, dünýäde-de, ahyretde-de näletlenendir. Olar üçin juda uly azap bardyr. Ol gün olaryñ dilleri, elleri we aýaklary eden günälerini aýdyp berip, öz garşylaryna şaýatlyk ederler. Alla mynasyp jezalaryny ol gün olara dolulygyna berjekdir, olaram Allanyñ hak we adalat esasynda höküm edendigini anyk bilerler".
Aýat şeýle dowam edýär:
“Ol arassa zenanlar we erkekler töhmetçileriñ ýöñkän zatlaryndan daşdadyr. Olar üçin günälerinden bagyşlanma we jennetde bol-elin ryzk bardyr"
#Töhmete duçar bolanyñ ýitirjek zatlary barada aýdylanda bolsa:
1). Töhmete duçar bolanyñ Allanyñ ýanynda ýitirjek zady bolmaz. Gaýtam utjak zady köp bolar. Allatagala: "Munuñ ýaly mümkinçilikler siziñ sogap gazanmagyñyza sebäp bolar" diýipdir. Ýagny, töhmete duçar bolandygyna garamazdan, doganlyk hukugyny, jemgyýetçilik asudalygyny bozup biläýjek hereketlerden daşda durar we töhmet atmakdan, töhmete duçar bolmakdan Allatagala sygynsa sogabyny gatbar-gatbar artdyrar. Aýratynam töhmet atan kişiniñ arkasyna günälerinden hem birnäçesi urulýar. Ilçilkde, biderek gep-gürrüñ edilende "günäsine galma" diýlen söz hut şonuñ üçin aýdylýar we bu hakykatdyr. Töhmete duçar bolan kişi töhmetçiniñ sogaplaryndan alar, ýa-da töhmetçiniñ sogap eden işleri bolmasa öz günälerini onuñ gerdenine ýüklär. Söýgüli pygamberimiz Muhammet Resulalla (s.a.w) magşarda munuñ ýaly kişilere "hakyky müflis" (ýagny "hiç zatsyz galan ykmanda" manysynda) diýip at beripdir.

2). Töhmete uçran kişi adamlaryñ gözünde aklanýança, ýagny hakykat orta çykýança aýyplanyp bilner. Emma ol bu döwürde Allatagala sygynyp geçirmeli we hiç kime ne dili bilen, ne eli bilen zyýanyny ýetirmese, ýene-de utuş gazanan ol bolar. Pygamberimiziñ (s.a.w) aýallaryndan Hezreti Äşe (r.a) töhmete uçranda ol we Pygamberimiz (s.a.w) diñe Allatagala sygynypdyrlar we hiç kime dil uzatmandyrlar.

3). Elbetde töhmetden halas bolmagyñ ýoly, ötünji, tobasy bardyr. Toba etmäge ýol goýulandygy üçin töhmet atmagyñ günäsinden hem arassalanmak mümkindir.
#Gysgaça durup geçjek bolsak:
1). Töhmet atan kişiñi, öz ýanynda ony bigünädigini mälim etmek;

2). Töhmet atan kişiñe maddy zyýan ýeten bolsa, onuñ öwezini dolmak;

3). Töhmet atan kişiñden razylyk almak.

4). Atan töhmetiñ üçin Allanyñ öñünde toba etmek we gaýdyp hiç kime töhmet atmazlyk.
#☆ Maglumat üçin serediñ:
1). "Nur" süresi, 23-25;
2). "Nur" süresi, 26;
3). "Nur" süresi, 11;
4). "Riyâzü’s-Sâlihîn", sahypa 195;
5). Buhary, 8/1151.