Parahorlyk

Gara Seýitliýew

Heý-de mugallymam para alarmy?

Para alýan bolsa mugallym däldir.

Mugallym pozulsa päklik galarmy?

Belki bu bir «myşdyr» hakykat däldir.
Hakykatmy? Hakykat däl, kim bilýär,

Mugallymlañ özi jogap bermese?

Ýöne nirä barsañ gürrüñ edilýär,

Halk diline almaz bir zat görmese?...
Has beterem ýoldaş mugallym hakda

Töhmet ýaýrap bilmez iliñ içinde.

Halkyñ ýüreginde mugallym hakda

Iñ eziz sözlerdir söhbet açañda?
Eýsem kim günäkär bu erbet «myşa»?

Ýalan myş hem al-asmandan inenok

Ýa bu-da azarmy ýaýran durmuşa?

Hawa diýmäñ! Ynanasym gelenok.
Ozallar-ozallar ýokdy bu gürrüñ.

Bu elhenç «myş» soñky ýyllar döredi!

Bir mugallymsumak hakda bu gürrüñ

Dörese-de, il içine ýaýrady?...
Ýene ýetip gelýär ekzamen wagty

Ne tanyşlyk, ne telefon geçmesin!

Goý, açylsyn ylmy söýýänleñ bagty,

Parahorlar «bagt bazaryn» açmasyn!
Men ýüz tutýan hemme mugallymlara,

Mugallymsumak däl, mugallymlara,

Arañyza düşen kä melgunlara

Gahar, gazap bilen göreliñ çäre!
Paraçyny paş edeliñ, pent bolsun,

Alymlara ak ýüreklik ant bolsun.

Mugallyma berlen päk, beýik ady

Hiç wagt, hiç adam, hiç unutmasyn!