"Geçmişdäki ýalňyşlaryň şu güne täsiri."

Eger-de Sizde geçmişe dolanyp haýsydyr bir zady üýtgetmek mümkinçiligi bolan bolsa, Siz dolanyp, dörän ýagdaýy üýtgetmegi islärdiňizmi? Hawwa-my? Ýöne gynansagam ýalňyşlary düzetmek üçin geçmişe dolanmak bizde mümkinçiligi ýok. Muňa garamazdan, ahmyr,ökünç we günäkärlik duýgysyndan saplanmaga kömek edýän ýollar bar.  Geliň ilkinji nobatda edilen ýalňyşlyklar dogrsynda ahmyr, ökünç duýgysynyň nireden döreýändigini seljerip göreliň. Hakykatda ähli zadyň özeni – bu biziň garaşmalarymyzdyr. Biz hemişe haýsydyr bir zada ymtylýarys, arzuw edýäris, belli bir netijä garaşýarys we netijede durmuş adamyň öňünde saýlaw goýýar. Biz logikamyza, duýgylarymyza ser salyp, saýlan ýolumyz boýunça gidýäris. Birdenem öz islän ýerimize däl-de, başga ýere gelendigimizi, öz arzuw eden zadymyza däl-de, asla pikir etmeýän zatlarymyza ýetendigimizi aňlaýarys. Ine, hut şu ýerde hem ahmyr etmeler başlanýar, geçmişe dolanylýar we “wah, men şol wagt.....”  ýaly ýüzlenmeler bilen ahmyr, ökünç beýan edilýär. Dana akyldar, şahyr Magtymguly Pyragynyň “Don bolsa” atly şygyryna ýüzlensek:

Ten ýapmaga köýnek istär ýalaňaç,

Köýnekli diýr: “Wah, üstünden don bolsa!”

“Baş saglyk” diýip, hakdan dilär garny aç,

Bäşiň tapan arzuw eder-on bolsa

- diýen setirlerinde adamyň arzuw-islegleriniň tükeniksizligi ahmyr, ökünç ýaly duýgylaryň döremegine getirýändigini beýan edilipdir.

Eger-de adam ýagdaýy seljerip, degişli tejribe toplap, durmuş ýoluny dowam etse, bu ýagdaý howp döretmeýär. Bu babatda türkmen halkynyň “Ýedi ölçäp, bir kes” diýen nakyly mysal getirmek ýerliklidir, ýöne şeýle aňlaýjylyk seýrek duş gelýär. Köplenç adam ahmyr, ökünç duýgysyny başdan geçirmek ýagdaýynda “togtaýar”, yzygiderli oňa dolanýar, özüni günäkärleýär, netijede günäkärlik we özüne kem baha garamaklyk duýgylary ony gurşap alýar. Bu bolsa geljekde adamyň saglygyna zyýan ýetirip bilýär.

Ahmyr-ökünçden we günäkärlik duýgysyndan nädip saplanmaly? Ýokarda belläp geçişimiz ýaly, onuň birnäçe ýollary bar.

Birinjiden, ähli zady doly seljermeli, özüňizi näme üçin günäkärleýäniňize düşünmeli. Siziň pikiriňizçe, onuň sebäbi nädogry saýlaw edilen durmuş ýoly bolsa, onda pikirleniň, öz ynsabyňyza ýüzleniň, Siz başgaça hereket eden ýagdaýyňyzda, ol Sizi islegiňize ýetirerdimi diýen soraga jogap berip görüň. Sebäbi köplenç biz näme barada ahmyr çekýändigimizi bilmeýäris. Bu ýerde bir zada düşünmek gerek – bolup geçýän zatlara berýän jogap täsirimiz bu biziň hususy saýlawymyzdyr.

Ikinjiden, öz – özüňizi bagyşlaň. Günäkärlik duýgysyndan ejir çekmegi bes ediň, degişli netijeleri çykaryň we bagtly ýaşamagy dowam ediň.

Üçünjiden, ünsüňizi şu günki günde jemläň. Eger-de günäkärlik duýgysy Size ejir çekdirýän bolsa, onda Siz geçmişde ýaşaýarsyňyz. Siziň hakyky durmuşyňyz bolsa deňiňizden geçip gidýär. Şu günki gün bilen ýaşaň. Bu barada Omar Haýýamyň rubagylarynda şeýle diýilýär:

Bilip goý, ýowuzdyr oýny pelegiň,

Dosty-ýaryň galbiriňde elegin.

Erkiň barka, özüň daýan özüňe,

Ertir giç, şu pursat algyn alanyň

Ýa-da:

Bir damja ummanda eňredi gitdi.

Birje toz topraga ornady gitdi,

Dünýä geldiň, gitdiň. Manysy näme?

Jyzlanam dem salym samrady gitdi.

Şeýle diýmek bilen, şahyr dünýäni boş ham-hyýallara beslenip geçirmezlik, mümkinçilik barka ony many-mazmunly geçirmek ugrunda alada etmekligi maslahat berýärdi.

Dördünjiden, meditasiýa, ýoga ýa-da başga bir ruhy amalyýet bilen meşgullanyň. Ol Size dartgynlykdan saplanmaga we öz –özüňiz bilen sazlaşykly gatnaşyklary ýola goýmaga kömek eder.

Durmuşyňyzyň her bir pursadynyň gymmatyny duýmaga ymtylyň. Geçip giden wagt we ömür yzyna dolanýan däldir!