Kuran we Sünnet saýasynda jynsy gatnaşygyň edebi.

Bismillähir-Rahmänir-Rahym.

Allah Tagala hamdu-sena, pygamberimiz Muhammed sallallahu
aleýhi we selleme we onuň maşgalasyna we sahabalaryna salawat we seläm bolsun.

Musulmanlaryň
bilmeli möhüm zatlarynyň biri hem är-aýal gatnaşygydyr. Bu gatnaşygyň içinde
esasy orun eýeläp duran zat jynsy gatnaşykdyr. Jemgyýetimiziň içinde soralmaga
çekinilýän mesele bolmak bilen bir hatarda, bu barada Kuran we Sünnet saýasynda
maglumat berýän Türkmençe kitaplaryň azlygy ýa-da düýbünden ýoklugy, bizi Yslam
ylymlaryndan mahrum edýän iň uly sepäbdir. Jynsy gatnaşygyň edebi barada
taýynlanan bu makala, diňe Kuran we sahih hadislara we ygtybarly ähli-sünnet
alymlarynyň fetwalaryna ýüz tutulyp taýynlanandyr.

Musulman
doganlarymyza peýdaly bolmagyny, Allah Tagaladan umyt edýäris.

1. Jynsy gatnaşykdan
sogaba garaşmak:

Är-aýal şehwetlerini (jynsy isleglerini) Allanyň buýruşy
ýaly halal ýoldan gidirip, namysyny goraýandyklary üçin sogap gazanjakdyrlar.
Pygamberimiz Muhammed sallallahu aleýhi we sellem aýtdy: “Jima (jynsy
gatnaşyk) etmegiňizde  sadaka (sogaby)
bardyr” diýdi, sahabalar: “Ýa Rasulullah biri jynsy gatnaşyk edeni üçin sogap
gazanýarmy?” diýip, jynsy gatnaşykdan sogap gazanyp boljagyny geň gördüler.
Pygamberimiz olara: “Eger haram ýoldan şehwetini gidirse günä gazanmazmy? Näme
pikir edýäňiz? Edil şonuň ýaly halal ýoldan şehwedini gidirse sogap gazanar.”
Diýdi. (Ahmed 5/167, 168. Muslim 1006/53. Ebu Zer razyAllahu anhdan).

2. Jynsy gatnaşykdan öň
oýnaşmak müstehapdyr:

Jabir (Alla ondan razy bolsun) öýlenende Pygamberimiz
Muhammed sallallahu aleýhi we sellem oňa: “Gyza öýlendiňmi ýa-da dula?”
diýip soraýar, ol bolsa dula öýlenenini aýdýar. Pygamberimiz oňa: “Näme üçin
gyz almadyň! Gyzlaryň agyz suwlary (has süýjüdir)” diýýär. (Sahih Buhari
5080). Alymlaryň aýdyşy ýaly bu hadisda jynsy gatnaşykda zenanyň
diliniň sorulyp, agyz suwunyň emilmegine yşarat edilendir. (Ymam Newewi,
Fethul-Bäri, 9/121). Erkek kişi aýaly doly lezzet alyp kanagatlanýança
jynsy gatnaşygy dowam etmelidir. Çünki bu olaryň bir-birine bolan söýgüni,
ysnyşygy has hem güýçlendirer.

3. Jynsy gatnaşykda
är-aýalyň doly çykarynmalary rugsatdyr:

Är-aýalyň arasynda owrat (örtülip, görkezilmeýän ýer)
ýokdur. We är-aýal jynsy gatnaşykda doly ýalaňaçlanmaklary rugsatdyr. Bu barada
rowaýat edilen şu hadis sahih däldir: “Sizden biri aýalyna ýanaşanda uýat
ýerini örtsün, doly çykarynmasyn.” (Nesai, Ymam Nesai ýokardaky rowaýat barada:
müňker hadis, diýendir). Aýşa enemiz (Alla onda razy bolsun): “Junup
bolanymyzda Rasulullah (sallallahu aleýhi we sellem) bilen bir gapdan suwa
düşerdik.” Diýip aýdýar. (Ahmed 6/210, Buhari 263, Nesai 462. Aýşa
razyAllahu anha’dan).

4. Jynsy gatnaşygy
Bismilläh we doga bilen başlamak:

Är-aýalyň jynsy gatnaşykdan öň hadisda aýdylan dogany
okamaklary müstehapdyr. Ibn Abbas (Alla ondan razy bolsun) rowaýat edýär:
“Pygamberimiz Muhammed sallallahu aleýhi we sellem aýtdy: “Aýaly bilen jynys
gatnaşyk etjek kişi: Bismilläh, Allahumme jennibniş-şeýtane, we
jennibiş-şeýtane mä razaktenä” (Terjimesi: Allanyň ady bilen! Allahym bizi
şeýtandan uzaklaşdyr we bize berjek çagaňdan şeýtany uzaklaşdyr) diýse,
ol gatnaşykdan bolan çaga şeýtan ebedi zyýan berip bilmez.” (Sahih Buhari
5165, Muslim 1434).

5. Islän görnüşde jynsy
gatnaşyk etmekleri jaizdir:

Jabir (Alla ondan razy bolsun) rowaýat edýär: “ýahudiler
Musulmanlara: Zenanyň uýat ýerine arkadan ýanaşsaň, çaga çaşy bolýar” diýdiler.
Soňra bu barada Allah Tagala şu aýaty indirdi: “Zenanlaryňyz siziň
ekiniňizdir, ekiniňize islän tarapyňyzdan ýakynlaşyň.” (Bakara 2/:223).
Pygamberimiz Muhammed sallallahu aleýhi we sellem: “Aýalyňyzyň uýat ýerine
öňden we arkadan ýanaşyp bilersiňiz.” Diýdi. (Tahawi, Şerhul-Meanil-Äsär
3/41 Senedi sahihdyr. Hadisyň asly sahihaýndyr). Är-aýal özleriniň
islän görnüşlerinde jynsy gatnaşyk etmekleri rugsatdyr.

6. Her jynsy gatnaşygyň
arasynda täret almak:

Jynsy gatnaşykdan soňra täzeden jima ediljek bolsa, täret
almak müstehapdyr. Pygamberimiz Muhammed sallallahu aleýhi we sellem aýtdy: “Jynsy
gatnaşyk edip, gaýtadan gatnaşyk etjek bolsaňyz, täret alyň.” (Ahmed 3/28,
Muslim 308/27. Ebu Said el-Hudri razyAllahu anh-dan).

7. Arka tarapyna gatnaşyk
etmek haramdyr:

Ýokarda belleýişimiz ýaly. Zenanyň uýat ýerine arka
tarapdan we başgada islän görnüşlerinde ýanaşmak rugsatdyr. Emma arka tarapyna
gatnaşyk etmek Yslamda haramdyr. Pygamberimiz Muhammed sallallahu aleýhi we
sellem aýtdy: “Allah haky aýtmakdan utanmaz, aýallaryňyza arkasyndan
gatnaşyk etmäň.” Diýendir. Başga hadisda: “Haýyzly aýaly bilen gatnaşyk
eden ýa-da arkadan jima eden kişi we palça gidip onuň diýenlerini tassyk eden
kişi Muhammede (sallallahu aleýhi we sellem) ugradylany inkär edendir.” (Sahih
hadis).

8. Zenan haýyzly (aýbaşy)
wagty gatnaşyk etmek haramdyr:

Zenan haýyzly wagty jynsy gatnaşyk etmek Kuran we Sünnet
bilen haramdyr. Pygamberimiz Muhammed sallallahu aleýhi we sellem aýtdy: “Haýyzly
aýaly bilen gatnaşyk eden kişi ...Muhammede (sallallahu aleýhi we sellem)
ugradylany inkär edendir.” (Sahih Hadis). Emma haýyzly wagty
uýat ýerine ýanaşmazdan, aýalyň bilen söýüşmek we bedeniniň başga ýerlerinden
lezzetlenmek rugsatdyr.

9. Aýal ýanaşmak isleýän
adamsyna garşy çykmagy jaiz däldir:

Ebu Hureýre (Alla ondan razy bolsun) rowaýat edýär: “Pygamberimiz
Muhammed sallallahu aleýhi we sellem aýtdy: “Adamsy aýalyny düşege çagyranda
aýaly gelmese, daňa çenli perişdeler oňa lagnat ederler.” (Sahih Buhari
5193, Muslim 1436).

10. Uýat ýerler birleşse
gusul parz bolar:

Döl suwy gelsede, gelmesede uýat ýerler birleşse,
är-aýala gusul almak parz bolýar. Pygamberimiz Muhammed sallallahu aleýhi we
sellem aýtdy: “...Erkegiň sünnet ýeri aýalyň sünnet ýerine birleşse gusul
almak parz bolar.” (Muslim 349/88, Aýşa razyAllahu anha’dan)

11. Är-aýal jynsy
gatnaşyklaryny başgalaryna aýtmagy jaiz däldir:

Är-aýalyň aralarynda bolan jynsy gatnaşygyny, gürleşen
zatlaryny başga kişilere gürrüň bermegi deýýuslyk, binamyslyk we haramdyr.
Pygamberimiz Muhammed sallallahu aleýhi we sellem aýtdy: “Kyýamat gününde
Allahyň gatynda ynsanlaryň iň şerlisi, aýalyna ýanaşandan soňra, onuň syryny
başgalaryna aýdan kişidir.” Diýendir. (Muslim 1437, Ebu Dawud 4870).

Ymam Newewi (Alla oňa rahmet etsin) bu hadis barada: “Bu
hadisda erkegiň aýaly bilen jynsy gatnaşygynda eden, gürleşen zatlaryny
başgalaryna aýtmagynyň haramdygy bildirilendir.” (Şerhu Sahih Muslim, 3/610).

12. Azil etmek (daşyna
dökmek) mekruhdyr:

Käbir degerli sebäplere görä azil etmek rugsatdyr. Mysal
üçin zenanyň saglygy sebäpli ýa-da iki ýylda bir çaga etmek üçin nobatlamak.
Emma hiç hili degerli sebäp bolmazdan ýa-da eklenji alada edip dowamly azil
etmek mekhruhdyr. Çünki öýlenmekden, maşgala gurmakdan asyl maksat nesiliň
köpelmegidir. Şonuň üçin Pygamberimiz Muhammed sallallahu aleýhi we sellem
sahih hadisynda musulmanlara dogurgan zenanlara öýlenmegi nesihat edendir.
Pygamberimizden azil etmek barada soranlarynda ol: “Bu gyz çagany
gizlinlikde ýere gömen ýalydyr.” (Muslim 1442, Ebu Dawud 3882, Tirmizi 2077,
Nesai 6/106, Ibn Mäje 2011).

Jabir (Alla ondan razy bolsun) rowaýat edýär: “Bir
adam Pygamberimiziň ýanyna gelip: “Meniň gyrnagym bar, onuň bilen jynsy
gatnaşyk edemde azil edýärin (bu bolýarmy)?” diýip, sorady. Pygamerimiz oňa:
“Seniň beýle etmegiň Allahyň takdyryna päsgel bolup bilmez. Isleseň azil et,
islemeseň etme! Takdyr näme bolsa, şol bolar.” Diýdi. Birnäçe wagtdan soň, ol
adam ýene geldi we: “Gyrnagym göwreli boldy.” Diýdi. Pygamberimiz oňa: “Men
saňa takdyr näme bolsa, şol bolar diýipdim.” Diýdi. (Sahih Buhari 5208,
Muslim 1440).

Çeşme: "Ähli-Sünnet we'l jemagat" VK.