Arap dünýäsi yranýar, emma Müsürde baýram

Tutuş Demirgazyk Afrikany,
Günorta Günbatar Aziýany we
Ýakyn Gündogary gurşap alan
protest hereketleri anna güni
Bahreýnde we Liwiýada
müňlerçe adamyň hökümet
güýçleri tarapyndan
öldürilenleriň jynaza namazyna
gatnaşmagy bilen ýasa öwrüldi.
Ýemende protestçiler öz
janlaryny howp astyna salmagy
dowam etdirip ýörkä, Eýranda
oppozisiýa üstümizdäki hepdede
polisiýa güýçleri bilen bolan
çaknyşyklarda ölenleri jaýlamaga
taýýarlyk görýär.
Gara geýinmedik ýeke-täk ýurt
häzir Müsür. Bu ýerde öňki
prezident Hosni Mubaregiň
agdarylan güni, 11-nji fewralda,
gazanylan ýeňiş gutlanyp, şatlykly
ýöriş geçirildi.
Wideo: Müsürde "Ýeňiş güni"
bellenilýär, Kair, 18-nji fewral.
Bu dabara mynasybetli Kairiň
Tahrir meýdançasyna
ýygnanlaryň biri Mohammad
Hosn. Ol hemmeleriň
tolgunýandygyny aýtdy: ”Biz bu
ýere rewolýusiýany dabaraly
bellemäge geldik. Ilki bilen
şehitler ýatlanmaly. Biziň
hemmämiz rewolýusiýany
berkitmek üçin üýşüşip, juma
namazyna geldik. Sebäbi entek
hemme zat üstünlikli ýerine
ýetirilenok. Ýöne iň möhüm talap
Hosni Mubaregiň wezipeden
çekilmegidi. Bu boldy”.
Müsürde öten aý başlanan
hökümete garşy protestler 18
günläp dowam edip, tutuş
dünýäniň ünsüni özüne çekdi.
Tunisde uzak wagtlap häkimiýet
başynda oturan prezident Zine el-
Abidine Ben Ali agdarylandan soň
gezek Müsür perzidentine ýetdi.
Bu hepde hem şular ýaly
demonstrasiýalar Eýranda,
Bahreýnde, Yrakda, Liwiýada we
Ýemende geçdi.
Penşenbe güni Ýemeniň Aden
şäherinde protestçiler bilen
hökümet güýçleriniň arasynda
çaknyşyk turdy. Protestçiler 7 gün
bäri demonstrasiýalary dowam
etdirip, 32 ýyllap ýurtda höküm
sürüp gelen Prezident Ali
Abdullah Salehiň häkimiýet
başyndan gitmegini talap
edýärler. Çaknyşyklarda bir
adamyň ölendigi aýdylýar.
Girizilen gadaganlyga
garamazdan, anna güni
Bahreýnde müňlerçe adam
paýtagt Manamanyň merkezi
Göwher meýdançasyna tarap
ýöriş etdiler. Bahreýnde hökümet
güýçleri tarapyndan edilen
hüjümde ölen dört adamyň
jynaza namazyna müňlerçe adam
gatnaşdy. Bu adamlar penşenbe
güni howpuzlyk güýçleri
protestçileri paýtagtyň merkezi
Göwher meýdançasyndan zor
bilen çykaranda öldi. 200
töweregi adam hem ýaralandy.
Şeýdip , üstümizdäki hepde
protestlerde ölenleriň sany alta
bardy.
Demonstrantlar ilatynyň 70
prosenti şaýylardan durýan, ýöne
sünni patyşasy tarapyndan
dolandyrylýan bu ýurtda giň
gerimli syýasy reformalaryň
geçirilmegini talap edýärler.
Liwiýada penşenbe günündäki
”Gahar-gazap gününden” soň
hem protestleriň gije dowam
edendigi aýdylýar. Aýdylyşyna
görä, bu ýerde hem 24 adam
ölüpdir. Ýurduň ikinji uly şäheri
Bengazide we al-Baýda
şäherinde müňlerçe adamyň
köçelere çykanlygy habar berildi.
Ölenleriň käbiri anna güni
jaýlandy.
Eýranyň oppozision partiýlary
adamlary 20-nji fewralda ýöriş
geçirmäge çagyrypdyr. Bu ýöriş
üstümizdäki hepde Tähranda
hökümete garşy protestlerde
öldürilen iki adamyň hatyrasyna
geçirilýär.
Yrakda ýurduň demirgazygynda
syýasy reformalary talap edip,
demonstrasiýa geçiren
märekäniň garşysyna kürt
howpsuzlyk güýçleri ot açypdyr.
Munda hem iň bärsinden iki
adamyň ölendigi habar berildi.