GEŇLIK

Umytlarymy gözleýärin! Her gün näçe gezek ýalbarýanymy bilemok. Emma ýalbaryp ýalbaryp, soňunda-da nähilidir umydyň kalbyma dolýanyny bilip galýaryn. Birgeňsi umyt-da bulam. Seni gabahat işden, nogsanlykdan päkleýän umyt. Şoňa-da şükür diýýärin. Başyma düşenleriň ýönelige dälligini bir men bilýärin, birem Alla! Bolýan her işde onuň hikmeti bar. Şonuň üçinem, men takdyrymdan birjigem dilgir däldirin. Näme eken bolsam, şonam orýaryn. Nähili ýaşan bolsam, şonam görerin.
Daşymy gallan umytsyzlyklaryň arasyndan zordan maňa ýetýän rehmet ülesinden peýdalanjak bolýaryn. Häläm, rehmetiň maňa çenli uzaýanlygyny görüp bilýärin. Muňa-da şükür. Adam bir hili köp ýaşadygyça, çagalykdan saplanyp uly ýaşa ýetdigiçe özüniň kimligine has oňat düşünýän eken. Kä wagtlar saňa ýaşamak hem agyr degýär. Kä wagtlar sen özüň ýaşap ýöreniňe-de ynanmaýaň. Kä wagtlaram, ýyllaryň deňiňden geçip barýanyna-da baş galdyrmaýaň... Bu „käwagtlaryň“ sany şeýle bir köp welin, ynsan olaryň arasynda azaşybam biljek. Gowusy, lüň basyp, olar bilen araňda serhet çekilmelimikä diýýärin. Adama has bolan häsiýetleriň biri hem – derrew dowula düşmek dälmi näme? Derrew dowula düşesimiz gelip durandyr. Ýeri beýle bolsa, biz näme üçin gijeleri arkaýyn uklaýarys. Näme ertir günüň dogjagyny anyk bilýärismi. Bilemizok. Emma dowula-ha düşüp baramyzok. Geň. Umuman, ynsanyň ýasalşam, onuň ýaşaýşam geň. Bu geňligiň giňligini, derejesini ölçemek mümkin däl. Sebäbi, ynsan her sekuntda, her minutda geň ýaşaýar. Bolmalysy ýaly ýaşamalysyndan juda daşdaky geňlikdir bu...