Unuň bolçulygy barada

Köneürgenjiñ magazinlerinde unuň ýokdugyny ýazýan adam kör bolmasa, halkymyzyň tamdyrlarynda bişýän çöreklerinden ýaňa magazindäki çörekleriň hem kän bir geçmeýändigini göräýmeli. Hudaýa şükür magazinlerimizde un hem, ýag hem, nabat-şekerimiz hem dolup dur. Hatda daýhanlarymyzyň aýdyşyna görä şu 2016-njy ýyl bugdaý üçin has-da bereketli ýyllaryň biri boldy. Halkymyzyň saçagy hiç haçan tamdyryň çöreginden mahrum däldir. Haýsy öýe barsak saçagy çörekli, petirli, pişme bogursaklydyr. Dogurlanyp aýtsam hazirki saçagymyzdaky bezeg, birwagtlarky raýkomyň, obkomyň öňünde-de ýokdy. Jübimizdäki pulymyzyň hem bar-ýokdugyndan nalamyzok, iýjegimize-geýjegimize ýetýär, janymyz sag, garnymyz dok, ojagymyz ýyly, ýataklarymyz mal-garaly, towuk-jüýjeli, iň esasy zat bolsa ýurdumyz parahat. Halkymyz toýam tutup otyr, märeke de berip otyr, jaý hem salyp otyr, hatda döwlediň özi ýeňillikli jaý gurmaga kömek edip dur, ýurt boýunça ýeke sany öýsüziň ýok ýeri, diňe Türkmen topragymyka öýdýän.
Elbetde bu ösüşlere birden ýetmek kyn zat. Ýetenden soň ony gorap saklamak ondanam kyn. Şol ösüşleriň sakasynda bolanlara Alla güýç we kuwwat bersin. Edil 20-30 ýyl mundan ozal biri bize gelip şu zatlary gürrüň berse ynanmazdyk, ýöne şu wagt görmäne göz gerek. Bu ösüşleri görmezlikden gelýän kişi, edil güni görmezlik üçin gözlerine kör äýnek dakynana meňzeýär. Ýagdaý şeýle bolsa-da ol kişi diňe özüne garaňkylyk edýär. Gün bolsa öz ýalkymly nuruny saçmagы dowam edýär.
Gynansak-da halkymyzyň akyl huşuny zäherlemek isleýänler tapylýar. Bişip süýjäp duran üzüme ýetip bilmedik tilki “turşy hem bişmedik üzüm eken” diýip at dakypdyr. Magtymguly atamyzyň aýdyşy ýaly (diňe) “Namart aýyp gözlär, dogan ilinden”. Olar ýaly namartlaryň yzyna öňem düşmedik, soňam düşmeris. Asyrlar boýy arzuw eden “Bir döwlete gulluk etsek bäşimiz” diýen döwrümizi gorarys. Döwlet birnäçe şahsyýet we maşgalalaryň bir ara gelmeginden ybaratdyr. Olaryň iň esasy güýçleri bolsa özara agzybirliginde bolup durýandyr. Şol agzybirligi, parahat durmuşy görübilmän, bozjak bolýanlar hakyky dönükleriň özleridir.
Ene topragymyz eýsem biziň üçin enemiz ýaly mukaddes dälmi näme? Sähel ýerden öz ýurdunyň, ene ýeriniň kemçiliklerini gözleýän kişi öz maşgalasynyň kemçiligini, öz enesiniň kemçiligini gözleýän gadyr bilmez, nadan kişi ýalydyr. Öz maşgalasyna, enesine at dakýan kişi bolsa dünýäde dinine we ynanjyna garamazdan iň akmak we nadan kişidir. Gurjak ýaly ýurdumyzyň müňläp gözelliklerini, artykmaçlyklaryny görmezlikden gelip, diňe kemçilikli ýerlerini, kemis taraplaryny gözleýän kişi, kemçilik tapmak üçin iň gowusy ýerinden turup aýna seretse ýagşy... onuň hem jan berip ýetişdiren perzentleri özlerine wagty gelip ikilik etse nähili bolardy-ka, ýa-da ömürlik ýanýoldaşy, ýassykdaşy ikilik etse, ýa-da ýakyn dost-ýarlary amanadyna hyýanat etse.
Sebäbi, bu dünýede ynsan, ýagşy-ýaman edenini görýändir, näme ekse şony da orýandyr; “ile çukur gazýan görip kişiler; şoňa düşjeklerine haçan düşüner”. Ynsan özüne berilýän bu azajyk ömrüni göriplik, bahyllyk, açgözlülik we näşükürlik bilen geçirmegiň deregine, ile-güne haýyrly zatlara sarp etse, kanagat ülkesini köňlüne jaý etse hakyky akyllydygyny subut ederdi.