Aýaz han

Aýaz han
Bir bar eken, bir ýok eken. Gadym zamanlarda bir patyşa bar eken, özi
adyllykda bir gyly iki ýarar eken. Günlerde bir patyşa pikir edip otyrka, öz
öňünde: “Ynsanyň, haýwanyň erbedini nädip tanamak bolar?” diýen soragy
goýupdyr. Şol bada-da: “Hä, tapdym, adamyň erbedi patyşa, malyň erbedi gatyr,
guşuň erbedi bolsa alahekge bolar” diýip, pikirini jemläp oturyberipdir.

Patyşa hemme ilatyny ýygnap:

- Meniň üç sany soragym bar, şony kim bilse, özüme wezir edip aljak - diýipdir.

Onda märeke:

- Aýt-da, aýt - bolşupdyr.

Patyşa:

- Adamyň, malyň, guşuň erbedini on günüň içinde maňa aýdyp bermeli - diýipdir.

Onda märekäniň içinden üç sany adam:

- Patyşam, rugsat bolsa, biz bir synansak - diýipdir.

Patyşa:

- Bolýar, rugsatdyr, bilip geliň - diýipmişin.

Ondan soň ýaňky üç adam patyşanyň ýumşuny bitirmek üçin ýola rowana bolupdyr.
Bulara ýolda bur gotur düýe sataşypdyr.

Olar:

- Hä, malyň şundan ýamany bolmaz, bize hudaý berdi, geliň, muny tutalyň - diýip,
ony tutup, özleri bilen alyp gidiberipdirler.

Ýene-de gidip barýarkalar, bularyň öňünden çypar köse adam çykypdyr.

Bular:

- Hä, adamyň şundan aýylganjy bolmaz, muny hem bize alla berdi - diýip, ony-da
özleri bilen alyp gidiberipdirler.

Ýene-de gidip barýarkalar, bularyň öňünden bir ganaty döwük garga çykypdyr.

Bular:

- Şundan erbet guş bolmaz, indi patyşanyň üç sany soragynyň üçüsiniň-de jogaby
jem boldy - diýşip, bu gargany hem özleri bilen alyp, yzlaryna gaýdyp gelýärler.(dowamy bar)...