Aşyk talybyň içgepletmesi

Salam teswirdeshler!!! Ynha yene bir goshgy... Muny belki ön eşdensiniz (S.T. aydym edip aydya)Awtory: yene shooool Toyly Owez eken🙂)

“Söýýän” sözün kim tapdyka aslynda?
Juda ýakymly söz aýtmaklyk agyr.
Ony aýtman galmak welin mümkin däl,
Şonsuz ýaşamagam mümkin däl ahyr.

Öz ýanynmdan elli gezek gaýtalap,
Öz-özüme beren bolup teselli.
“S” harpynam diýmän sakawlap durun,
Seniň gözleriňe gözüm düşende.

Gaýdyp gelýän bile ýaşan oglanlam,
Soraýarlar. “Ýeri, nätdiň, aýtdyňmy?!
Ýa-da ýene bu gezegem öňkiň deý,
Bolgusyz gürrüňler bilen gaýtdyňmy?!”

Bilenoklar öz başyna düşmänsoň,
Ýogsa menem aýtjakdan-a näçezar...
Bile gelýäs ýaňky kinoň täsiri
Hakda gürrüň edip çola köçeden.

Gürrüňlermiz oba hakda, öý hakda,
Baýramçylyk, şanly seneler hakda,
Özge söýüşýänler, söýýänler hakda,
Okuw, mugallymlar, ýeneler hakda.

Gürrüň arasynda bolsa şo sözi,
Men saňa aýtjagam-aýtjagam bolýan.
Şol gudratly sözüň, jadyly sözüň,
Aýdylarna garaşýanyňam bilýän.

Çekinjeňlik gursun, ýene bolmady,
Hoşlaşdyk, sen gaýtdyň öýňüze bakan.
“Söýýän” sözi bilen tassyklanýança,
Bu söýgümiz oýunmyka, çynmyka.

Gaýdyp gelýän, öz-özüme igenýän,
Gep bilen aýlandyň dünýäň ýüzüni.
Nämäňe derkardy kinoň gürrüňi,
Aýtmaga derek “söýýän” sözüni.

Näçe urunsaň-da bu gün-ä geçdi,
Erte gelse ýene bagt synalar.
Kä kellä bolgusyz pikirler gelýär,
Wah, bir zady oňarmandyr köneler.

Şo sözi oglanlar gyzlara däl-de,
Gyzlar oglanlara aýtmaly bolsa.
Görsene nähili hezil bolardy,
Olaram duýardy kyndygyn şonda.

Aý, bolýa, bu zatlaň barysy hyýal,
Biderek özümi azara goýýan.
Ertir bir daň atsyn, hökman aýdaryn,
Bagyşla, “Garagöz, men seni söýýän!”