TOÝA DÄL-DE, ÝASA GIDÝÄS TIRKEŞIP

OZAL HEM INDI

Gaçdy süýji ukularyň mazasy,

Garawul dek, haçan görseň, oýa men.

Köpden bäri arak-şerap içemok,

Hem gidemok gijelerne toýa men.

Köşeşipdir hyjuwymyz, ýok indi

Öňki ter duýgular, öňki ter keşp.

Birçak biz tirkeşip toýa giderdik,

Indi bolsa ýasa gidýäs tirkeşip.

ÝAZGY

Seň yşkyňa düşüp ýören günlerim,

Bolup ýören günlem däli-diwana.

Kömür bilen seň adyňy ýazypdym

Kenardaky ak saraýyň diwarna.

Ýöne ilem bilýär ekeni meniň

Bilýän däldir öýdüp ýören zadymy.

Kimdir biri seniň adyň yzyna

Goşmak goýup ýazypdyr meň adymy.

SEN ÖÝDE BOLMASAŇ

Sen öýde bolmasaň, daralýar dünýäm,

Seň ýoklugyň meni ruhdan düşürýär.

Aýal diýlen zadyň düýp manysyna

Ýanýoldaşy ol ýok wagty düşünýär.

Sen ýokkaň, gelende begensin diýip,

Ähli zady salyşdyrýan tertibe.

Sen bolmasaň, uklap bilemok, işläp,

Ýa-da dik oturyp çykýan ertire.

ÝALŇYZLYK

Sary saçyň kültemine

Meňzäp ýatyr bede ýerde.

Bir torgaýjyk gaýmalap ýör,

Ol biçäre karar tapýar

Ne asmanda, ne-de ýerde.

Wah, kim onuň bu sataşan

Derdine derman eýlesin?!

Ýalňyz galan guş elewräp

Ýören bolsa, ýalňyz galan

Adam jowranman, neýlesin?!

Awtory Atajan Annaberdiýew.